НИТХ-аас өнгөрсөн хоёрдугаар сард тогтоол гаргаж, нийтийн тээврээр үйлчлүүлэх үнийн тарифт зарим өөрчлөлт оруулсан. Улмаар нэгдүгээр сарын 1-нээс иргэд 1000 төгрөг төлж, хугацаа хамаарахгүй дөрвөн удаа зорчих байв. Гэвч программ хөгжүүлэлтийн ажил хараахан дуусаагүй байгаа учраас түр хугацаагаар хойшилсон юм. Тэгвэл ирэх сарын 1-нээс буюу энэ бямба гарагаас тус шийдвэр хэрэгжиж, иргэд нийтийн тээврээс 1000 төгрөгөөр зорчихоор болжээ. Үүнд Чингис хаан олон улсын нисэх буудал руу явдаг X:19, X:20 чиглэл хамаарахгүй юм байна. Харин хүүхэд 200 төгрөгөөр зорчих юм. Чиглэлийн тарифыг 1 удаа төлж зорчсоноор 3 удаа дамжин суух боломжтой бөгөөд автобуснаас буух бүрдээ төхөөрөмжид U -money картаа дарснаар дамжин суух хөнгөлөлтийг эдэлнэ гэдгийг Нийтийн тээврийн бодлогын газраас мэдээлэв. Ингэхдээ хугацаа хамаарахгүй бөгөөд өдөрт дөрвөөс дээш удаа зорчих бол 1000 төгрөг нэмж төлнө. Дашрамд дурдахад боловсролын тухай хуульд өөрчлөлт оруулах үеэр оюутнуудын автобусанд хөнгөлөлттэй зорчдог зохицуулалтыг хүчингүй болгосон тул оюутнууд ч мөн 1000 төгрөг төлж автобусаар зорчих аж.
Сэтгэгдэл (0)
Сэтгэгдэл бичигдээгүй байна