Малчдын зээлийн хүүгийн зургаан хувийг малчид өөрөө, үлдсэн хувийг Засгийн газар төлнө

Засгийн газрын өнөөдрийн /2024.02.28/ хуралдааны шийдвэрийг ЗГХЭГ-ын дарга Д.Амарбаясгалан танилцуулав.

Тэрбээр, Засгийн газрын өнөөдрийн хуралдаанаар малчдын зээлийн эргэн төлөлт болон зээлийн хүүгийн эргэн төлөлтийг нэг жилээр хойшлуулах шийдвэр гаргалаа. Хойшлуулахтай холбоотой арилжааны банкуудад хүүгийн хуримтлал үүснэ. Тиймээс зээлийн хүүгийн зургаан хувийг малчид өөрөө, үлдсэн хувийг Засгийн газар төлөхөөр зохицуулж байна.

Малчдын зээлийн хүү дунджаар 20.5 хувь, нэг малчин дунджаар 10 сая төгрөгийн зээлтэй байна. Улсын хэмжээнд малчдын зээлийн хэмжээ 1.3 их наяд төгрөг. Түүнд хуримтлагдах хүүгийн төлбөр 280 орчим төгрөг байх тооцоо гарсан. Үүнээс 6 хувийн хүүг малчид, үлдсэн хувь болох 220 орчим тэрбум төгрөгийн хүүгийн төлбөрийг Засгийн газар төлөхөөр шийдвэрлэлээ.  

Ерөнхийлөгчөөс Засгийн газарт малчдын зээлийн хүүгийн төлөлтөд хөнгөлөлт үзүүлэх, эргэн төлөлтийн хугацааг сунгах асуудлыг тавьсан.

-Малчдын зээлийн эргэн төлөлтийг яагаад хойшлуулах болов?
-Малчдын орлого тасалдах бодит нөхцөл үүссэн. Мах борлуулах, ноос ноолуураас орох орлого тасалдах өндөр эрсдэлтэй нөхцөл үүссэн тул зээлийн төлөлтийн хугацааг хойшлуулж байна. Энэ шийдвэрийн хүрээнд Сангийн сайд Монголбанк болон арилжааны банкуудтай яриа хэлэлцээр хийж, ирэх долоо хоногийн Засгийн газрын хуралдаанд тогтоолын төсөл оруулж батлуулахаар боллоо гэв.