АНУ-Д 8553 НИСЛЭГ СААТАЖ, 6816 НИСЛЭГ ЦУЦЛАГДЖЭЭ

Европын нисэх буудлуудаас АНУ руу хөөрөх бүх нислэгийг бямба гарагийн UTC цагаар өглөөний 5 хүртэл түр зогсоосон гэж Европын агаарын хөдөлгөөний удирдлагын байгууллага болох Eurocontrol мэдэгджээ. 

Eurocontrol-д Европын холбооны 27 улс, Их Британи, Турк, Израил зэрэг нийт 42 улс гишүүнээр элссэн байдаг.

АНУ-ын Холбооны нисэхийн удирдах газрын (FAA) хүсэлтийн дагуу Брюссель дэх Сүлжээний удирдлагын шуурхай ажиллагааны төв уг мэдэгдлийг гаргасан байна. 

Харин эсрэг чиглэлд буюу АНУ-аас Европ руу нисэх зарим онгоц хөөрөх зөвшөөрөл авчээ. Тухайлбал, сүүлийн хоёр цагийн хугацаанд Бостон, Нью-Йорк, Вашингтоны нисэх буудлуудаас Дублин, Копенхаген, Лондон, Милан, Парис, Ром зэрэг хотыг зорьсон хэд хэдэн онгоц хөөрсөн байна. 

Австралийн Сиднейгээс АНУ руу нисэх онгоцуудыг нисэх буудлын талбайд хүлээлгэж, зарим нь гурван цаг хүртэл саатаад байна. Онгоцууд АНУ-д хүрээд газардах боломжгүй байж болзошгүй гэж FAA болгоомжилсны улмаас тэдгээрийг Австралид түр саатуулаад байсан юм. Харин одоо хөөрөх зөвшөөрлийг нь ээлж дараалан олгож байгаа аж.

АНУ-ын нисэхийн байгууллагууд улс даяар нислэгийн хөөрөлтийг дөрвөн цаг гаруйн хугацаанд зогсооход хүргэсэн системийн томоохон доголдол нь дэлхийн олон орны хэдэн мянган зорчигчийн аяллыг алдагдуулж, хүндрэл учруулжээ.

FAA-гаас улс даяар нислэгийн хөөрөлтийг түр зогсоох буюу “ground stop” хэмээх ховор тохиолддог шийдвэр гаргасан бөгөөд энэ нь АНУ-ын зүүн бүсийн цагаар 16 цагаас өмнөхөн эхэлж, 20 цаг 15 минут хүртэл үргэлжилсэн юм. 

Холбоо, радио давтамжийн сувгууд болон радарын ажиллагааны доголдол Чикагод эхэлсэн гэж нисэхийн салбарын мэдээллийн The Air Current сайт мэдээлжээ. АНУ-ын нисэх буудлуудаас хөөрөх бүх нислэгийг гэнэт зогсооход хүргэсэн “харилцаа холбооны системийн саатал” яг юунаас үүдсэн нь одоогоор тодорхойгүй байна.

Нислэгийн хөдөлгөөн хянах FlightAware сайтын мэдээллээр, 8553 нислэг саатаж, 6816 нислэг цуцлагджээ.

Дональд Трамп энэ үеэр дуугараагүй нь ховор үзэгдэл болов. Харин Тээврийн сайд Шон Даффи, Дотоодын аюулгүй байдлын сайд Марквейн Маллин нар FAA шинэ технологи нэвтрүүлсний дараа хуучин технологид суурилсан системүүд өгөгдлийн ачааллаа даахаа больсон нь саатлын шалтгаан болсон гэсэн тайлбар хийжээ.

Оклахома мужаас сонгогдсон сенатор асан, өдгөө АНУ-ын Дотоодын аюулгүй байдлын яамыг тэргүүлж буй Маллин “Үүнийг кибер халдлага байсан гэж үзэх ямар ч нотлох баримт бидэнд илрээгүй” хэмээн мэдэгдсэн байна.

Энэ нь 2001 оны есдүгээр сарын 11-ний халдлагаас хойш АНУ даяар бүх нислэгийн хөөрөлтийг түр зогсоосон хоёр дахь тохиолдол юм. Өмнө  нь 2023 оны нэгдүгээр сард FAA дотоодын бүх нислэгийн хөөрөлтийг хоёр хүрэхгүй цагийн хугацаанд түр зогсоож байжээ.