Нийслэлийн жижиг, дунд үйлдвэр үйлчилгээг дэмжих төвөөс сар шинийн баярыг угтан жил бүр “Амар байна уу” өргөтгөсөн үзэсгэлэн худалдааг зохион байгуулдаг. Энэ удаагийн сар шинийн үзэсгэлэн худалдаа 2025 оны хоёрдугаар сарын 01-27-ны өдөр хүртэл үргэлжилэхээр болжээ.
Иргэд сар шинийн баярт зориулан гарын бэлэг болон бусад зүйлсээ авахаар БНХАУ руу олноороо зорчдгоос зөвхөн сар шинийн баярын өдрүүдэд 1.3 их наяд төгрөг урагш валют болж гардаг тухай тооцоолол бий. Тиймээс “Амар байна уу” үзэсгэлэн худалдааг жил бүр зохион байгуулснаар дотоодын бүтээгдэхүүнээ зах зээлд борлуулах нөгөөтэйгүүр хямд үнээр худалдан авах боломжийг иргэдэд олгодог гэдгээрээ худалдаа ач холбогдолтой юм. Тэгвэл энэ удаагийн “Амар байна уу” үзэсгэлэн худалдаа өмнөх жилүүдийнх шиг Шинэ зуун айлын худалдааны төвд биш хотын А бүс буюу "Их наяд плаза"-гийн 6 давхарт болно. Талбайн түрээс журмын дагуу үнэ, төлбөргүй байх ба худалдаа эрхлэгчдэд бүтээгдхүүнээ хямдралтайгаар худалдаалах шаардлага тавих аж.
“Амар байна уу” үзэсгэлэн худалдаанд оролцсон аж ахуйн нэгж, иргэд 2023 онд 40 гаруй тэрбум төгрөг, 2024 онд 51 тэрбум төгрөгийн орлого олсон байна.
Нийслэлийн Засаг даргын санаачилгаар эдийн засгийн эргэлтийг эрчимжүүлэх, жижиг, дунд бизнес эрхлэгчдийг дэмжих зорилгоор зохион байгуулагддаг тус үзэсгэлэн худалдаанд нийслэлийн харьяа соёл урлагийн 11 байгууллага, 220 гаруй соёлын ажилтан, өвлөн уламжлагчид соёл, урлагийн үйл ажиллагаа явуулахаар төлөвлөж байгаа юм байна.
Сэтгэгдэл (0)
Сэтгэгдэл бичигдээгүй байна