"Уянгалянхуа хөгжил" ТББ-аас Говь-Алтай аймгийн хэмжээнд “Өрхийн тахианы аж ахуй” төслийг хэрэгжүүлэн тахианы аж ахуйн үлгэр жишээч аж ахуй болох зорилт тавин ажиллаж байна.
"Уянгалянхуа хөгжил" ТББ нь аймгийн иргэдийн амьжиргаанд хувь нэмрээ оруулах, аймгийн үйлдвэрлэлийг солонгоруулах, импортыг орлох бүтээгдэхүүнийг дэмжиж өрхийн амьжиргааг тэтгэх зорилгоор аймаг бүрд "Өрхийн тахианы аж ахуй хөгжүүлэх" төсөл санаачлан хэрэгжүүлэх зорилтынхоо хүрээнд эхний аймгаар Говь-Алтай аймгийг сонгон үйл ажиллагаагаа 2024 оны нэгдүгээр сараас хэрэгжүүлж эхлээд байгаа юм.
2023 онд Монгол Улс нийт өндөгний хэрэглээнийхээ 59 хувийг импортоор оруулж ирсэн байна. Тус ТББ нь тахиа, өндөгний хэрэгцээг 100 хувь эх орондоо үйлдвэрлэж хангах болох боломжтой салбар гэж үзсэн учраас импортын 10 хувийг өөрсдөө үйлдвэрлэж чадах өрхийн аж ахуйг дэмжин эл төслийг хэрэгжүүлж эхэлжээ. Тэд тахианы аж ахуй эрхлэх сургалтаас эхлээд төсөлд хамрагдсан өрхүүдээ тахиа шувуугаар ханган, шаардлагатай бүх тоног хэрэгслүүдийг нийлүүлсэн байна. Энэ төслийн хамгийн том давуу тал нь өөрсдийн хөгжүүлсэн өрхийн тахианы аж ахуйгаас гарах өндгийг өөрсдөө худалдан авч өрхүүдээ бүрэн чадавхижуулж, өрхийн орлогын эх үүсвэрт нь бодит хувь нэмэр оруулж буйгаараа онцлогтой аж.
Өрхийн тахианы аж ахуйг хөгжүүлэн иргэдийг энэ чиглэлд чадавхжуулах, цаашлаад амжилттай ажиллаж буй өрхүүдийг нэгтгэн өрхийн тахианы аж ахуйг өргөтгөн ферм хэлбэрт шилжүүлэх аж. Үүний сацуу тус аймгийн хэмжээнд иргэдийг дотоодын шинэ өндгөөр хангах, орлогоо нэмэгдүүлэх боломжийг бий болгоход ийнхүү дэмжлэг үзүүлэн хамтран ажиллаж байна.
Сэтгэгдэл (0)
Сэтгэгдэл бичигдээгүй байна