Улсын хэмжээнд зохион байгуулж буй мал,тэжээвэр амьтдын тооллого өнгөрсөн бямба гарагт эхэлсэн ба ирэх мягмар гараг буюу 12 сарын 17-нд дуусах юм.
Манай улс мал тооллогыг өмнө нь зун, намрын улиралд зохион байгуулдаг байсан бол 1961 оноос эхлэн жилийн эцэст буюу 12 дугаар сард тоолдог болсон. Энэ хугацаа нь мал аж ахуйн үйлдвэрлэлийн жилтэй тохирдог, малын орлого, зарлагын үзүүлэлт бүрэн гарч дууссан, малчид өвөлжөөндөө бууж, хүн, малын хөдөлгөөн харьцангуй бага байдаг зэрэг давуу талтай байдаг аж.
Мөн малын тооллогын үр дүнг макро түвшний тооцоо, судалгаанд ашиглаж, салбарын бодлого боловсруулах, шийдвэр гаргах мэдээллийн гол эх үүсвэр болгон ашигладаг бөгөөд салбарын эдийн засгийн тооцооны тулгуур үндэслэл болдгоороо ихээхэн ач холбогдолтой.
Мал тооллогын явц байдлын талаар зарим эх сурвалжаас мэдээлэл хүргэе. Хөвсгөл аймагт мал тооллогыг газар дээр нь нэг бүрчлэн харж тоолох үйл ажиллагаанда 1000 гаруй төрийн албан хаагчийг хамруулаад байна. Тус аймаг өнгөрсөн онд 5 сая 660 мянга гаруй мал тоолуулж улсдаа тэргүүлсэн. Гэвч нийт малын тоо нь өмнөх оныхоос 594 мянган толгойгоор буюу 9,5 хувиар буураад байна. Дархан-Уул аймгийн хувьд энэ жил мал тооллогыг техник технологид тулгуурлан богино хугацаанд, шуурхай зохион байгуулах үүднээс дрон ашиглахаар болсон байна. Тиймээс нийт 30 хэсэгт дроноор тоолох туршилтыг өнгөрсөн долоо хоногт эхлүүлжээ. Нийтдээ 40 чиглэлд 110 тоологч ажиллаж, 2099 малчин болон мал бүхий өрхийн дүнг нэгтгэх юм байна. Өнгөрсөн жил Дархан-Уул аймаг 1178 малчин 921 мал бүхий өрхийн 261 мянга 286 толгой мал тоолуулжээ.
Сэтгэгдэл (0)
Сэтгэгдэл бичигдээгүй байна