Өндөр цалинтай ажилд орох, сайхан хүүхэнтэй суух, нэр алдартай болох мөрөөдөлтэй нэгэн залуу байжээ.
Нэг их цас орсон өдөр ажлын ярилцлага өгөхөөр явж байтал урд нь настай эр бүдрээд уначихав. Яарч байсан болохоор “Архи уугаад согтсон хүн байна” гэж бодоод туслалгүй яваад өгч. Тэгээд ярилцлагандаа орсон боловч бүтэлгүйтээд, хүссэн ажилдаа ч орсонгүй.
Зуны нэгэн сайхан үдэш цэцэрлэгт хөгжилтэй, сонирхолтой жүжиг үзэв. Жүжиг дуусч, хүмүүс алга ташин баяр хүргэж, тарж байх үед хэн нэгэн мөрөнд нь хүрлээ. Эргээд хартал жүжгийн гол баатар хөгшин алиалагч эмэгтэй байв. Тэрбээр “Жүжиг таалагдав уу” гэж асуухад залуу түүн рүү харалгүй, ярих дургүй байгаагаа илт илэрхийлэн гэрийн зүг алхлаа.
Бороотой өдөр залуу халуун усанд орж, дулаан хөнжилдөө хурдхан орохыг бодон явж байтал шүхэр ч байхгүй, ганцаараа уйлж суусан эмэгтэй залуугаас мөн л тусламж хүсэв. Залууд халуун дулаан орон гэр нь бодогдон түүнд туслалгүй цааш явав.
Залуу аз жаргалгүй амьдарсаар үхэж гэнэ. Тэнгэрт очоод сахиусан тэнгэртэй уулзаад:
– “Би ёстой утгагүй, аз жаргалгүй амьдралыг тууллаа. Гурван мөрөөдөлтэй байсан, аль нь ч биелсэнгүй” гэв.
Гэтэл сахиусан тэнгэр :
– ”Чиний мөрөөдлийг биелүүлэхийн төлөө би бүхнийг хийсэн. Зөвхөн чамд гар, нүд, сэтгэл хэрэгтэй байсан юм даа”
“Юу тэр вэ?”
“Зам дээр унасан настай эрийг санаж байна уу. Тэр бол чамайг ажилд авах компаний захирал байсан юм. Чи түүнд гараа өгөөд босгосон бол болох байлаа. Хөгшин алиалагч эмэгтэйг санаж байна уу. Тэр чамд дурласан гоо бүсгүй байсан юм. Чи түүнийг анхааралтай харсан бол чинийх болох байлаа. Орцны гадаа уйлж суусан эмэгтэйг санаж байна уу. Тэр эмэгтэй алдартай зохиолч байсан юм. Чи түүнд хань болж, гэртээ оруулсан бол тэрээр чиний тухай алдартай бүтээл бичих байлаа. Чи бусдад сэтгэл гаргадггүйгээсээ болж, хайхрамж, халамжгүй амьдарсан.” Сахиусан тэнгэр ийн хэлтэл,
Залуу уртаар санаа алдаад, гүн харанхуйд уусан алга болов.
Одоо цагт нүдээ аниад, гараа хумхиад, сэтгэлээ нуугаад, өөрийгөө хуурч сохроор өнгө, мөнгө, амбиц харж амьдрах залуус олон болж.
Хүмүүс минь эргэн тойрондоо анхааралтай, сэтгэлтэй байж, гар нүд сэтгэл гурваа бусдад харамгүй хайрла!
Хүн бүрт боломж үргэлж ирдэг юм шүү”.
Сэтгэгдэл (0)
Сэтгэгдэл бичигдээгүй байна