“Монгол бахархлын өдөр” арван долоодугаар жарны модон луу жилийн өвлийн тэргүүн сарын шинийн нэгэн буюу 2024 оны 11 дүгээр сарын 2-ны бямба гарагт тохионо.
Их эзэн Чингис хааны мэндэлсний 862 жилийн ой, “Монгол бахархлын өдөр”-ийг тохиолдуулан Д.Сүхбаатарын талбайд Монгол Улсын Төрийн далбааг мандуулж, Их эзэн Чингис хааны алтан сургааль, айлдвараас сонордуулан, Төрийн тугийг цэнгүүлнэ.
Мөн энэ өдөр Монголын түүх судлалыг дэмжих тухай Ерөнхийлөгчийн зарлигт гарын үсэг зурах, гардуулах ёслолын үйл ажиллагаа болох аж. Монгол Улсын Ерөнхийлөгчийн зарлигт Монголын түүх судлал, олон улсын монгол судлалыг дэмжих, Монголын түүхийн иж бүрэн 30 боть номыг эмхэтгэн хэвлүүлэх, олон нийтийн түүхийн боловсролыг дэмжих, дээшлүүлэх цогц арга хэмжээг тусгана гэж Ерөнхийлөгчийн Боловсрол, шинжлэх ухаан, технологийн бодлогын зөвлөх Ч.Лодойравсал мэдэгдлээ.
Түүнчлэн Монгол Улсын төрийн дээд шагнал, тэргүүн зэргийн “Чингис хаан” одон гардуулах ёслолын ажиллагаа болох бөгөөд энэ жил тус одонг НҮБ-ын ерөнхий нарийн бичгийн дарга асан Бан Ги Мүнд хүртээхээр болсон байна.
Мөн Их Эзэн Чингис хааны хөшөөнд хүндэтгэл үзүүлж, чансаа өндөр 128 бөхийн барилдааныг уламжлал ёсоор зохион байгуулах юм. Барилдаанд түрүүлсэн бөхөд Монгол Улсын Ерөнхийлөгчийн нэрэмжит “Чингис хаан” шилжин явах цомыг анх удаа гардуулна.
Монгол Улсын Ерөнхийлөгчийн зарлигийн дагуу 2024 оны 11 дүгээр сарын 4-ний өдөр Богд хааны Ордон музейд тууль хайлах ажээ.
Сэтгэгдэл (0)
Сэтгэгдэл бичигдээгүй байна