Нийслэлийн автозамын хашлагыг сольж буй нь сүүлийн үед олны шүүмжлэлд өртөөд байгаа. Энэ асуудлаар Нийслэлийн Засаг дарга Х.Нямбаатар мэдээлэл хийхдээ УИХ-ын дарга асан З.Энхболдын нэрийг дурдсан бөгөөд З.Энхболд ч дор нь хариу барилаа.
Х.Нямбаатар “Үүр шөнийн заагаар Зандаахүүгийн Энхболд очоод чулуун бордюрыг хагалж цохичихоод зураг авчихаад явж байгаа гэдэг ийм мэдээллийг би авсан. Тэгэхээр өнөөдөр та бүхэн маш хариуцлагатай шийдвэр гаргаарай.
Энэ 2 хулгайчийн үг үйлдлийг хамтдаа АТГ, Үндэсний аудитын байгууллагаар шалгуулъя. Энэ жилдээ хэдүүлээ тэвчээртэй хуучин замтайгаа, үлдсэн 60 замаа засахгүйгээр оръё. Ирэх жил хяналт шалгалтын байгууллагууд шалгаад энэ бордюр замын төсөв хөрөнгө нь болж байна уу, үгүй юу гэдгийг нэгмөсөн магадалсны дараа орвол яасан юм бэ. Энэ дээр та бүхэн маань идэвхтэй оролцож өгөөч гэдгийг хичээнгүйлэн хүсэж байна.” гэсэн юм.
Хариуд нь З.Энхболд “Урд шөнө Улаанбаатар хотын Засаг дарга Х.Нямбаатар гэдэг нөхөр намайг гүтгэжээ. Би Өвөрхангай аймгийн Баруунбаян-Улаан суманд мод зүлэг тарьж долоо хоносон. Нарийнтээл, Уянга сумаар ороод одоо харих гэж байна. Уянга сумын эрх чөлөөний хөшөөний хажууд байна" гээд шууд бичлэгээр явж буй газраа харуулав.
Мөн "Өвөрхангайд долоо хонож байгаа хүн яаж алх бариад Улаанбаатарын бордюрыг хагалах вэ дээ. Тийм тэнэг бодол Х.Нямбаатарын толгойд л орохоос өөр хүний толгойд орохгүй байх л даа.
Хорин хэдэн мянган төгрөгийн бордюрыг зуун хэдэн мянган төгрөгөөр авсандаа хариулт өгөхийн оронд алх бариад хагалсан тухай яриад байгаа нь ойлгомжгүй байна. УИХ-ын гишүүн байсан, хотын дарга хүн арай ийм доошоо орж, гүтгэлэг хийхээ боль, залруулга гарга. Би энд мод зүлэг тариад буянтай ажил хийгээд явж байна. Улаанбаатарын сонгуулиа Улаанбаатартаа л хий, надад ямар хамаа байна аа. Харин ч би энэ бордюрын учрыг олъё гэж бодлоо. Яахаараа хорин хэдэн мянган төгрөгийн бордюр 132 мянгаар орж ирдэг юм. Яахаараа ганц алхаар цохихоор хагарчихдаг юм. Хэрвээ чулуу юм бол хагарахгүй ш дээ. Яахаараа замаа засахын оронд бордюроо солиод байдаг юм бэ?
Одоо З.Энхболд бордюр хагалсан учир замын ажлаа зогсооё гэж дараагийн сери явах юм байна. Юун тийм алх бариад хагалж байдаг завтай хүн байх вэ дээ.
Арай ч дээ, Х.Нямбаатар аа. Намайг алх бариад бордюр хагална гэдэгт Монголын ард түмнийг итгэнэ гэж бодож байгаа юм уу. Худал гүтгэлгээ зогсоо. Уучлал гуйгаарай. Үгүй бол гүтгэсэн хэргээр цагдаад өгнө шүү.” гэв.
Сэтгэгдэл (0)
Сэтгэгдэл бичигдээгүй байна