Ц.ЭЛБЭГДОРЖ Л.ОЮУН-ЭРДЭНИЙГ ЭСЭРГҮҮЦСЭНИЙ ХАРИУД Х.НЯМБААТАР...

Ерөнхийлөгч асан Ц.Элбэгдорж өнөөдөр өөрийн цахим хуудастаа Ерөнхий сайд Л.Оюун-Эрдэнэд хандан 35 минутын бичлэг оруулсан. 

Тэрбээр С.Зоригийг хөнөөсөн хэрэг, Эрдэнэтийн 49 хувь зэргийн талаар ярьснаас гадна Л.Оюун-Эрдэнэд “Чи эх орноо шорон шиг, социализмын үеийн уурын зуух шиг болголоо. Хүмүүс гарч зугтахын түүс болж байна. Чамайг тойрсон хүмүүс  л сайн сайхан амьдарч байгаа байх. Бусдынх нь амьдрал нойл заалаа. Чамайг хүмүүс нойл гэж нэрлэж, дуудаж байгаа. Л.Оюун-Эрдэнэ ээ, чиний сайд нэг бүр тендерчин, төсөвчин, авлигач байгаа. Чи үнэхээр шударга юм бол сайд нараа сонгуульд нэр дэвшүүлэхээ болиоч. Чи ард түмэндээ өр, хулгай дарамт, үнийн өсөлт, ядуурал, дампуурал авчирсан.” гэх мэтээр ярьсан билээ. 

Мөн олны өмнө хоёулаа ил ярья гэж “дуудаад” зогсохгүй Rokit Bay-н дууны үгийг “ашиглан” “Би чиний тархинд удаан оршино, түрээсгүй... Чи мөрөөдлийн суудалдаа миний нэрээр хүрсэн. Чи үхсэн карьераа миний нэрээр хадгалж байгаа. Миний нэр бол чиний Библи” гэж хэлээд ч амжив. 

Энэхүү мэдээллийн дараа Нийслэлийн Засаг дарга Х.Нямбаатар өөрийн хаягтаа “Монголын заяа их учир Нөмрөг, Минжийн хангайд нисдэг тэргээр төлөө дагуулсан амьтан хядаж, байгаль сэндийчин алт ухсан нүгэлт гөрөөчний Эрдэнэт, Тавантолгойг авах гэсэн атгаг шунал нь бүтээгүй. Камераа бариад сурвалжилга хийсэн сэтгүүлч пулемётоор амьтан хядсан нүгэлт араатнаас хавь илүү ариун шүү. Хаусаар мөнгө угаах бол түүний хувьд энүүхэнд биз.” гэж бичсэн байна.

Эрх мэдэлтнүүд биесийнхээ харыг гайхаж, янз бүрийн баримт бичих ч тэр нь үнэн худал нь мэдэгдэхгүй замхарч байгаад иргэд олон нийт таагүй ханддагийг энд дурдах нь зүйтэй байх.