Сонгуулийн ерөнхий хорооноос өнөөдөр /2024.05.26/ мэдээлэл хийж, нэр дэвшигчдийн материалыг 7 хоногийн дотор хуульд нийцсэн эсэхийг хянаад 6 дугаар сарын 1-ний өдрийн дотор нэр дэвшигчээр бүртгэх эсэхийг шийдвэрлэж, тогтоол гаргана гэж мэдэгдэв. Мөн Ардчилсан намаас өнөөдрийн дотор тодруулга, тайлбар авахаар албан бичиг хүргүүлсэн гэлээ.
СЕХ-ны Тамгын газрын дарга Д.Бат-Эрдэнэ “Ардчилсан намаас тогтоол, 126 нэр дэвшигчийн материалыг ирүүлсэн. Гэвч үүнээс хойш иргэнээс 5 дугаар сарын 20-ны өдөр нэр дэвшүүлэх үйл ажиллагаа явагдсан тухай 09 дүгээр тогтоол гэх баримт, бас АН-ын СЕХ-той шууд харилцах хүний зүгээс энэ тогтоол дээр техникийн алдаа гарсан байна гэдэг агуулгаар 74 хүний нэр бүхий хавсралт баримтыг ирүүлсэн. Хэдийгээр АН-аас нэг баримт ирүүлсэн ч түүнтэй холбоотой 2 иргэнээс тогтоол гэх баримтыг ирүүлж байгаа учраас СЕХ-ны зүгээс яг энэ асуудлаар тодруулга, тайлбар авна гэдэг байдлаар өнөөдөр АН-д хандаад байна. Өнөөдрийн дотор хариуг ирүүлэх хугацааг зааж явуулсан. Ямар учраас хоёр тогтоол гараад ирэв гэдэг талаар тодорхой тайлбарыг эрх бүхий байгууллагаас нь, намын даргаас нь тодруулж авна гэдэг байдлаар хандаад байгаа. Магадгүй энэ тодруулга, тайлбар тодорхой ирэхгүй, цаашдаа нөхцөл байдал ойлгомжгүй байна гэж үзэх юм бол шүүхийн байгууллагаар энийг тогтоолгох нөхцөл байдал үүсэж магадгүй. Иймээс тодруулгыг маш тодорхой өгөх шаардлага бий гэдгийг хэлэх байна.” гэв.
Мөн тэрбээр асуултад хариулах үеэрээ АН-ын Тэргүүн дэд дарга С.Баярцогтоос СЕХ-нд хүсэлтээ ирүүлсэн. Энэ хүсэлтэд тавдугаар сарын 20-ны өдрийн Үндэсний бодлогын хорооны тогтоол гэх баримтыг ирүүлээд байгаа. АН-аас СЕХ-той шууд харилцахаар албан ёсоор хуульд заасны дагуу мэдээллээ өгсөн, хуульч Д.Оросоогоос 32-р тогтоолд техникийн алдаа гарсан байна, үүнийг залруулъя гэдэг байдлаар нэр дэвшигчдийн мэдээлэл бүхий баримтыг ирүүлээд байгаа гэж ярьсан юм.
Сэтгэгдэл (0)
Сэтгэгдэл бичигдээгүй байна