Ж.ЧИНБҮРЭН: ЭМТЭЙ ХОЛБООТОЙ НОТЛОХ БАРИМТ ИРҮҮЛЭХГҮЙ БОЛ ХАРИУЦЛАГА ТООЦНО

УИХ-аас байгуулсан Эмийн үнийн өсөлтийн шалтгаан нөхцөлийг хянан шалгах үүрэг бүхий Түр хорооны дарга, УИХ- ын гишүүн Ж.Чинбүрэн мэдээлэл хийж, хянан шалгах үйл ажиллагаанд саад учруулан нотлох баримт гаргаж өгөхгүй байгаа байгууллага, албан тушаалтнуудыг нэрлэв

 Ж.Чинбүрэн "Түр хороо байгуулагдаад нэлээд хугацаа өнгөрлөө. Хянан шалгах түр хороонд таван хянан шалгагч, зургаан шинжээчийг томилон ажиллуулж байна. Хяналт, шалгалтын хуулийн дагуу тусгай шалгалтын сэдвийн хүрээнд холбогдох төрийн байгууллагууд, албан тушаалтнуудаас нотлох баримтыг цуглуулж, шинжлэн, судалж байгаа юм.

Нотлох баримтыг шинжлэн судлах сонсголыг 3 дугаар сарын сүүлээр хийхээр төлөвлөсөн боловч төрийн зарим байгууллага, нотлох баримт гаргаж өгөхөөс зайлсхийх, нуун дарагдуулах, зөрүүтэй мэдээлэл ирүүлэх зэргээр саад учруулж байна. Энэ нь УИХ-ын үйл ажиллагааг тасалдуулах хэмжээний асуудал үүсгэж байна” гээд дараах нэрсийг зарлалаа.

1. Эрүүл мэндийн  сайд Эм, Эмнэлгийн Хэрэгслийн Хяналт Зохицуулалтын Газарт зайлшгүй шаардлагатай эмийн 8, 9, 10 дугаар болон хүүхдийн 1,2,3 дугаар жагсаалттай холбоотой нотлох баримт гаргуулахаар гурван удаа албан бичиг хүргүүлсэн боловч ЭМЯ-ны архивт байхгүй. ЭМЯ-ны дэргэдэх Эм зүй, эм судлалын мэргэжлийн салбар зөвлөлөөс ав гэсэн хариу өгсөн.

Эм зүй, эм судлалын мэргэжлийн салбар зөвлөлийг Д.Энхжаргал гэж эмэгтэй хариуцдаг. Тэрбээр Эмийн холбооны тэргүүн, АШУҮИС-ийн эм зүйн тэнхимийн багш хүн. Тус зөвлөлд дахин бичиг хүргүүлэхэд хариуцсан ажилтан нь "Архивт байхгүй, гар ноорог бий, ЭМЯ-нд байх ёстой, эмнэлэгт хэвтсэн" зэрэг шалтгаанаар уг нотлох баримтыг одоог хүртэл гаргаж өгөөгүй байна.

Шаардаад байгаа нотлох баримт бол хөнгөлөлттэй үнээр олгодог эмийн жагсаалт юм. 2024 онд 140 тэрбум төгрөг төсөвлөж, иргэдэд нэн шаардлагатай эмийг хөнгөлөлттэй үнээр олгох жагсаалтыг нэхээд байгаа. Уг жагсаалтыг хэрхэн баталсан, батлах явцад ашиг сонирхлын зөрчил байсан эсэхийг тодорхойлоход хэрэгтэй баримт бичиг. Гэтэл архивт байхгүйг хэлсэн.

2. ГССҮТ, Цус сэлбэлт судлалын үндэсний төв, Өргөө амаржих газар, Дөрөвдүгээр амаржих зэрэг газрууд эмийг худалдаж авах судалгаа, холбогдох нотлох баримтыг ирүүлээгүй.

3. Архангай, Баянхонгор, Сүхбаатар, Төв, Увс, Хөвсгөл, Ховд, Хэнтий аймгийн Засаг дарга нар холбогдох нотлох баримтыг ирүүлээгүй.

4. Нийгмийн эрүүл мэндийн газар, Завхан, Говь-Алтай, Төв аймгийн эрүүл мэндийн төв нотлох баримтыг ирүүлээгүй.

Үүнээс гадна Түр хороонд ирүүлж буй нотлох баримтуудын мөнгөн дүн алдаатай, дутуу, хуульд заасан шаардлагыг хангаагүй зөрчил олон байна.

Түр хорооноос эдгээр баримтыг дахин шаардлага хангуулах, дутуу ирүүлсэн баримтыг бүрдүүлэх, алдаатай мэдээллийг хянах зэргээр хугацаа алдаж байна.

Шаардсан нотлох баримт бичгийг хүндэтгэх шалтгаангүйгээр ирүүлэхгүй байх, зориуд зайлсхийсэн, Түр хорооны үйл ажиллагаанд санаатай саад хийж буй холбогдох албан тушаалтанд УИХ-ын Хяналт, шалгалтын тухай хуульд заасны дагуу хариуцлага тооцох болно гэдгийг албан ёсоор мэдэгдэж байна" гэв.

Түр хороо шинжээчдээр дүгнэлт гаргуулж, уг асуудлаар нээлттэй сонсгол зохион байгуулах зорилгоор байгуулагдсан бөгөөд нотлох баримт ирүүлэхгүй байгаагийн улмаас энэхүү үүргээ гүйцэтгэж чадахгүй байгаа талаар хэлж байлаа.