Ерөнхий сайдын захирамжаар байгуулагдсан шатахууны хангамж, түгээлтийг нэмэгдүүлэх үүрэг бүхий шуурхай штабын ээлжит хуралдаан боллоо. Хурлыг Аж үйлдвэр, эрдэс баялгийн сайд Г.Дамдинням удирдан зохион байгуулж, аж ахуй нэгжүүдэд дараах үүрэг, чиглэлүүдийг өглөө.
Хөдөө, орон нутагт ШТС-ууд зориулалтын саванд шатахуун олгохгүй байна гэдэг асуудлыг иргэдийн зүгээс тавьсан. Тэгвэл шуурхай штабын зүгээс зөвхөн Улаанбаатар хотод АИ92 шатахууныг саванд олгохгүй байх зохицуулалтыг түр хугацаанд хэрэгжүүлж, 8-р сарын 15-нд хязгаарлалтыг зогсоосон байдаг. Иймээс хөдөө орон нутагт автобензин болон дизель түлшийг зориулалтын саванд хэвийн олгохыг АҮЭБ-ын сайд Г.Дамдинням аж ахуй нэгжүүдэд сануулж, бүх ШТС-уудад мэдээлэл хүргэж ажиллах үүргийг өглөө.
Өнгөрсөн долоо хоногоос эхлэн орон нутгийн шатахууны хангамжийг нэмэгдүүлэх ажлыг эрчимжүүлж эхэлсэн. Гэсэн ч хөдөө орон нутагт шатахууны хүлээгдэл бүрэн арилаагүй байна. Тэр дундаа Өмнөговь, Архангай, Дорнод, Дорноговь, Төв аймгуудад шатахууны хүлээгдэл өндөр байгаа учраас тус таван аймагт нэн даруй хангамжийг нэмэгдүүлэх үүргүүдийг аж ахуй нэгжүүдэд өглөө.
Мөн шуурхай штабын өнөөдрийн хурлаар уул уурхай, хөдөө аж ахуйн салбарын аж ахуй нэгжүүдийг дизель түлшний гурван сарын нөөц бүрдүүлэхийг үүрэгдлээ. Өнөөдрийн байдлаар “Дарханы төмөрлөгийн үйлдвэр” ХХК – 7,6 хоног, “Багануур” ХК 12 хоног, “Монголросцветмент” ТӨҮГ – 55 хоног, “Шивээ-Овоо” ХК- 22 хоног, “Эрдэнэт” ТӨҮГ – 16 хоног, “Эрдэнэс Алт Ресурс” ХХК – 15 хоног, “Цемент Шохой” ХХК – 20 хоногийн тус тус нөөцтэй байна. Харин “Эрдэнэс Тавантолгой” ХК гурван сарын хэрэглээг хангах хатуу гэрээ байгуулах болоод 20000 метр кубын багтаамжтай агуулах барих бэлтгэл ажлуудыг хангаж байна. Ойрын хугацаанд агуулах, сав түрээслэх, нэмэлт нөөц бүрдүүлж, эргэн мэдээлэх үүргийг өглөө.
Сэтгэгдэл (0)
Сэтгэгдэл бичигдээгүй байна