НҮБ-ын Цөлжилттэй тэмцэх конвенцын талуудын 17 дугаар бага хурлын үеэр Үндэсний Статистикийн Хороо, Үндэсний Аудитын Газар хамтран “Өгөгдөлд суурилсан газрын доройтлын менежмент” сэдвийн хүрээнд салбар хуралдааныг 2026 оны наймдугаар сарын 21-ний өдөр зохион байгуулсан юм.
2025 оны үндэсний үнэлгээгээр Монгол Улсын 1.56 сая км² нутаг дэвсгэрийн 81.9 хувь нь цөлжилт, газрын доройтолд өртсөн байна. Мөн НҮБ-ын Цөлжилттэй тэмцэх тухай конвенцын үндэсний тайлагналын ТХЗ-ын 15.3.1 үзүүлэлтээр доройтсон газрын эзлэх хувь 2015 онд 13.5 хувь буюу 209.7 мянган км² байсан бол 2020 онд 23.4 хувь буюу 362.6 мянган км² болж нэмэгджээ. Эдгээр үнэлгээ нь арга зүй, хамрах хүрээний хувьд ялгаатай ч Монгол орны газрын төлөв байдалд гарч буй өөрчлөлтийг илүү нарийвчлалтай хэмжиж, бодлого, шийдвэрийг чанартай тоон мэдээлэлд тулгуурлан гаргах шаардлага нэмэгдсэнийг харуулж байгааг хуралдааны үеэр онцолсон юм.
Түүнчлэн Үндэсний статистикийн хорооны дарга Б.Батдаваа “Газрын нөхөн сэргээлт, ган гачгийг тэсвэрлэх чадавхыг дэмжихэд зарцуулж буй хөрөнгө оруулалт зорилтот үр дүнд хүрч буй эсэхийг үнэлэхэд бидэнд харилцан уялдаатай, шийдвэр гаргалтад ашиглах боломжтой чанартай өгөгдөл нэн шаардлагатай. Бид сүүлийн жилүүдэд статистикийн системийн хөгжлийг бэхжүүлж, үйл ажиллагааг боловсронгуй болгоход анхаарч, тооллого, судалгааны мэдээллийг төрийн байгууллагуудын захиргааны бүртгэл, мэдээллийн сан, орон зайн болон гар утасны өгөгдөл зэрэг шинэ төрлийн өгөгдөлтэй уялдуулан ашиглах боломж бий болгож байна” хэмээн тодотгосон.
Салбар хуралдааны үеэр Үндэсний Статистикийн Хороо, Үндэсний Аудитын Газар, эрдэм шинжилгээний байгууллагуудын хооронд өгөгдлийн стандарт, аргачлалыг уялдуулах, чадавхыг бэхжүүлэх, бодлого, бодит туршлагыг холбосон түншлэлийг хэрхэн бэхжүүлэх талаар санал солилцсон байна.
Сэтгэгдэл (0)
Сэтгэгдэл бичигдээгүй байна