Цөлжилттэй тэмцэх тухай Нэгдсэн Үндэстний Байгууллагын конвенцын Талуудын 17 дугаар бага хурал Улаанбаатар хотноо тав дахь өдрөө үргэлжилж байна.
Өнөөдрийн /2026.08.21/ хөтөлбөрийн онцлох арга хэмжээний нэг нь COP17-ын Хотын дарга нарын форум бөгөөд хот, орон нутгийн удирдлагууд газрын доройтол, цөлжилт, ган, усны хомсдолын эсрэг орон нутгийн түвшний бодит шийдэл, газрын тогтвортой менежмент, хот–хөдөөгийн уялдаа, ногоон дэд бүтэц болон уур амьсгалын тэсвэртэй байдлыг хэлэлцэнэ.
Форум 8 дугаар сарын 20–22-нд үргэлжилж, оролцогчид “Улаанбаатарын тунхаглал” боловсруулах чиглэлээр ажиллаж байна.
Өглөө 10-13 цагт Нэгдсэн хорооны дөрөвдүгээр хуралдаанаар UNCCD-ийн бусад холбогдох олон улсын конвенц, байгууллага, институцтэй хамтын ажиллагааг бэхжүүлэх, мөн иргэний нийгмийн байгууллагуудыг Конвенцын хурал, үйл явцад оролцуулах асуудлыг хэлэлцэнэ.
Үдээс хойш 15–18 цагт Конвенцын хэрэгжилтийг хянан шалгах хорооны /CRIC/ зургаадугаар хуралдаанаар дараагийн ажлын хөтөлбөр болон COP-д танилцуулах тайлан, шаардлагатай тохиолдолд шийдвэрийн төслүүдийг боловсруулна. Үүнтэй зэрэгцэн Шинжлэх ухаан, технологийн хороо /CST/ тайлангаа баталж, чуулганаа хаана. Үүний дараа Талуудын бага хурлын дөрөвдүгээр хуралдаанаар CST болон CRIC-ийн тайлан, зөвлөмжийг авч хэлэлцэхээр хөтөлбөрт тусгажээ.
Өдрийн турш болох дагалдах арга хэмжээнүүдээр гангийн үндэсний төлөвлөгөөг хөрөнгө оруулалттай холбох, бэлчээрийн үнэ цэнэ ба тогтвортой хөрөнгө оруулалт, газар сэргээхэд залуучууд, эмэгтэйчүүдийн оролцоо, газрын эзэмшил ашиглалтын эрх, хүнсний тогтолцоо, мөн биологийн олон янз байдал–уур амьсгал–газрын бодлогын уялдаа зэрэг асуудлыг хэлэлцэнэ.
Монгол Улсын өргөөнд мөн газрын доройтол, газрын менежмент ба нөхөн сэргээлтийн статистик, байгаль орчин–эдийн засгийн данс, бэлчээрийн доройтлын судалгаа, нүүдлийн мал аж ахуйн уламжлалт мэдлэг, ойн экосистемийн нөхөн сэргээлтийн хөрөнгө оруулалт, түншлэлийн асуудлаарх хөтөлбөрүүд үргэлжилнэ.
Сэтгэгдэл (0)
Сэтгэгдэл бичигдээгүй байна