Шатахууны нийлүүлэлт, хангамжийг нэмэгдүүлэх шуурхай штабын ээлжит хуралдаан боллоо. Өчигдрийн байдлаар Монгол улсын хилээр нийт 9482,5 тонн газрын тосны бүтээгдэхүүн импортоор орж ирсэн байна. Үүний 3059 тонн нь АИ92 автобензин байна. Улаанбаатар хотын өртөөнүүдэд шатахууны цувааг хүлээн авч, шилжүүлэх ажлууд тасралтгүй хийгдсээр байна. Одоо замд нийт 52 вагон шатахуун ирж байгаа бөгөөд оройн 23:00, шөнийн 03:00 цагуудад Улаанбаатар хотод ирнэ гэсэн төлөвлөгөөтэй байна. Шатахууны хангалт нэмэгдэж, хоногт зөвхөн Улаанбаатар хотод 1500-1700 тонн АИ92 автобензиныг нийлүүлж байна. Цаашид аймгийн төвүүд болоод сумдад шатахууны нийлүүлэлтийг эрчимжүүлэн ажиллах үүрэг даалгавруудыг өгөөд байна.
Нийслэлийн хэмжээнд үйл ажиллагаа явуулж байгаа бүх ШТС-уудыг ямар нэгэн хязгаарлалтгүй, 24 цагийн турш тасралтгүй ажиллуулах үүрэг, чиглэлийг шуурхай штабын зүгээс аж ахуй нэгжүүдэд өгөөд байна. Түүнчлэн нэр бүхий ШТС-ууд зөвхөн талоноор, харилцагч байгууллагууддаа олгож байна гэх иргэдийн гомдлууд цөөнгүй ирж байна. Энэ дагуу нэр бүхий шатахуун импортлогч компанид иргэн, байгууллага гэж ялгаварлахгүй байх, зөвхөн талоноор олгоно гэсэн хатуу зохицуулалт байж болохгүйг сануулж, зөрчлөө арилгахыг анхаарууллаа.
Сэтгэгдэл (0)
Сэтгэгдэл бичигдээгүй байна