Монгол Улсын Их Хурлын чуулганы хуралдааны дэгийн тухай хуулийн 112 дугаар зүйлд заасны дагуу ээлжит чуулганы хугацаанд сар бүрийн сүүлийн долоо хоногийн Баасан гарагийн үдээс хойших нэгдсэн хуралдаанаар Улсын Их Хурлын асуулгын цагийг зохион байгуулдаг. Асуулгын цагаар улс орны өмнө тулгамдсан асуудлаар Ерөнхий сайдад асуулт тавьж, тайлбар, хариултыг сонсохын зэрэгцээ Улсын Их Хурлын гишүүд байр сууриа илэрхийлж, мэтгэлцээн өрнүүлдэг.
2026 оны хаврын ээлжит чуулганы асуулгын цагтай холбогдуулан Ерөнхий сайдад хандан Улсын Их Хурлын гишүүдээс ирүүлсэн асуултыг нэгтгэн parliament.mn цахим хуудсанд тухай бүр нийтэлж, олон нийтэд хүргэлээ. Тухайлбал, 2026 оны дөрөвдүгээр сарын 24-ний өдрийн асуулгын цагийн өмнө Ерөнхий сайдад хандан 17 гишүүнээс ирүүлсэн асуултыг нийтэлсэн бол тавдугаар сарын 29, зургадугаар сарын 26-ны өдрүүдийн асуулгын цагийн өмнө гишүүдээс ирүүлсэн асуултыг хуульд заасан хугацаанд нэгтгэн цахим хуудсанд нийтэлсэн юм.
Асуулгын цагт Ерөнхий сайд биечлэн оролцох хуулийн зохицуулалттай бөгөөд энэ нь парламентын хяналтыг хэрэгжүүлэх зорилгоор Улсын Их Хурлын гишүүдээс Ерөнхий сайдад хандаж асуулт асууж, хариулт авах хэлбэрээр парламентын ардчилалыг нээлттэй, тэгш, чөлөөт мэтгэлцээн, үзэл бодлын өрсөлдөөн бий болох тогтолцоог бүрдүүлэх ач холбогдолтой юм.
Энэ утгаараа Улсын Их Хурлын асуулгын цаг нь цөөнхийн бүлэгт оногдсон хугацааны хоёрны нэг хүртэлх хугацааг тухайн бүлгийн дарга, эсхүл бүлгээс томилогдсон гишүүний цуварсан асуултаар эхлүүлж мэтгэлцэх зарчмаар зохион байгуулдаг байна хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.
Сэтгэгдэл (0)
Сэтгэгдэл бичигдээгүй байна