Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг (КОП17) зохион байгуулах Үндэсний хороо өнөөдөр хэвлэлийн бага хурал хийж, бэлтгэл ажлын явц, олон улсын оролцогчдын бүртгэл, зохион байгуулалтын бэлтгэл болон үлдсэн хугацаанд хэрэгжүүлэх ажлуудын талаар мэдээлэл өглөө.
Байгаль орчин, уур амьсгалын өөрчлөлтийн сайд Ц.Сандаг-Очир Монгол Улсын Засгийн газар COP17-ыг зөвхөн олон улсын арга хэмжээ бус, газрын доройтолтой тэмцэх үндэсний бодлогоо дэлхийн бодлого, хамтын ажиллагаатай уялдуулан шинэ шатанд гаргах стратегийн боломж гэж үзэж байгааг онцлов.
Ирэх наймдугаар сарын 17-28-ны өдрүүдэд Улаанбаатар хотноо болох COP17 нь дэлхийн 197 талын төлөөллийг нэг дор цуглуулж, газрын доройтол, цөлжилт, гангийн эсрэг хамтын шийдвэр гаргах хамгийн өндөр түвшний олон улсын форум юм болохыг тэмдэглээд одоогийн байдлаар 4500 хүн хуралд оролцохоор бүртгүүлсэн бөгөөд өдөр тутам нэмэгдэх хандлагатай байна гэлээ.
Энэхүү хурал нь Монгол Улсын олон улсын хамтын ажиллагааг шинэ шатанд гаргах, байгаль орчны салбарын манлайллаа бататгах, ногоон хөрөнгө оруулалт, тогтвортой хөгжлийн шинэ боломжийг нээх чухал ач холбогдолтой юм.
Бэлтгэл ажлын явц өнөөдрийн байдлаар 82 хувьтай байна. Монгол Улс COP17-ыг талуудыг нэгтгэсэн, хамтын шийдлийг урагшлуулсан үр дүнтэй бага хурал болгож, олон улсын хамтын ажиллагаанд бодит хувь нэмэр оруулахаар ажиллаж байгааг сайд мөн тодотгосон юм.
Мөн хурлын үеэр өндөр дээд түвшний уулзалтууд, сайд нарын хэлэлцүүлэг, Business4Land, Fashion4Land зэрэг олон улсын тусгай арга хэмжээ, Ногоон бүсийн олон нийтэд зориулсан хөтөлбөрүүд зохион байгуулагдаж, газрын доройтолтой тэмцэх бодлого, инновац, хөрөнгө оруулалт, хамтын ажиллагааны асуудлыг хэлэлцэнэ. Оролцогч улсуудын 100 хувийн саналаар хэлэлцээрийг баталдаг онцлогтой.
КОП17 нь Монгол Улсын байгаль орчны бодлого, нүүдлийн соёл иргэншил, газрын тогтвортой менежментийн туршлагыг дэлхийд таниулах, олон улсын түншлэл, хөрөнгө оруулалтыг нэмэгдүүлэх стратегийн ач холбогдолтой юм.
Үндэсний хороны Ажлын алба хурлын бэлтгэл ажлын талаар олон нийт, хэвлэл мэдээллийн байгууллагуудад тогтмол, нээлттэй мэдээлэл хүргэж, КОП17 бага хурлыг амжилттай зохион байгуулахын төлөө бүх талын хамтын ажиллагааг ханган ажиллаж байгаа аж.
Дашрамд дурдахад 2026 он нь НҮБ-аас зарласан "Бэлчээр болон нүүдлийн мал аж ахуй эрхлэгчдийн олон улсын жил" тохиож буйгаараа онцлогтой. Энэ нь дэлхийн хэмжээнд бэлчээрийн экосистемийн үнэ цэнэ, нүүдлийн мал аж ахуйн тогтвортой хөгжилд анхаарал хандуулах чухал боломжийг бүрдүүлж байгаа юм.
Сэтгэгдэл (0)
Сэтгэгдэл бичигдээгүй байна