Монгол Улсын дээд шүүхийн нийт шүүгчийн хуралдаан өнөөдөр /2026.05.18/ болжээ.
Нийт шүүгчийн хуралдаанаар 2026 оны 5 дугаар сарын 15-ны өдрийн эхний хэлэлцсэн асуудлын санал хураалтын дүнг хүчингүйд тооцох эсэх асуудлыг хэлэлцээд олонхын саналаар хүчингүйд тооцож, Сонгуулийн ерөнхий хорооны гишүүнд нэр дэвшүүлэх асуудлыг дахин хэлэлцсэн байна. Хуралдаанаас нийт шүүгчийн олонхын санал авсан Доржсүрэнгийн Мөнхзоригийг Сонгуулийн ерөнхий хорооны гишүүнд нэр дэвшүүлж, Улсын Их Хуралд санал болгохоор тогтжээ.
Сонгуулийн ерөнхий хорооны есөн гишүүний хоёрыг Улсын дээд шүүх төрийн жинхэнэ албан хаагчдаас санал болгосноор УИХ зургаан жилийн хугацаагаар томилохоор хуулиар зохицуулсан байдаг. Дээрх хоёр орон тоонд нээлттэй сонгон шалгаруулалт зарлахад ердөө хоёр нэр дэвшигч материалаа ирүүлсэн нь Улсын дээд шүүхийн Тамгын газрын дарга Содномцэрэнгийн Заяадэлгэр, Шүүхийн сахилгын хорооны Ажлын албаны дарга Доржсүрэнгийн Мөнхзориг нар байсан юм.
Харин Дээд шүүхийн нийт шүүгчид Д.Мөнхзоригийг дэмжсэн ч Дээд шүүхийнхээ Тамгын газрын дарга С.Заяадэлгэрийг Сонгуулийн ерөнхий хороонд нэр дэвшүүлэхийг дэмжээгүй байна. Дашрамд дурдахад Дээд шүүхээс нэр дэвшсэн хүн УИХ дэмжвэл Сонгуулийн ерөнхий хорооны орон тооны бус гишүүнээр ажиллах бөгөөд өөрийн албан ажлаа давхар гүйцэтгэдэг зохицуулалттай юм.
Сэтгэгдэл (0)
Сэтгэгдэл бичигдээгүй байна