Байгаль орчин, уур амьсгалын өөрчлөлтийн сайд Ц. Сандаг-Очир Цөлжилттэй тэмцэх тухай НҮБ-ын талуудын 17 дугаар Бага хурлыг зохион байгуулах төслийн талбайд өнөөдөр /2026.04.04/ ажиллалаа.
Энэ үеэр төслийн явцын талаар БОУАӨЯ-ны Төрийн нарийн бичгийн дарга Ш.Батбаяр болон холбогдох албаны хүмүүс мэдээлэл өгчээ.
Үндэсний цэцэрлэгт хүрээлэнд 26,9 га талбайд СОР17 хурлын үндсэн арга хэмжээг зохион байгуулах бөгөөд үүнээс барилгажих талбай нь 44 мянган м.кв. Нийт 800 машины авто зогсоол, 20 түр байгууламж барина.
Инженерийн шугам сүлжээ, ус, мэдээлэл холбооны сувагчлалын ажил төлөвлөгөөний дагуу хийгдэж, улсын комисст хүлээлгэн өгсөн. Үндсэн зам талбайн ажил тавдугаар сард дуусна.
“Хөх бүс”-д хийгдэх ажил төлөвлөгөөний дагуу явагдаж, наймдугаар сарын 5-н гэхэд бүрэн дуусгахаар ажиллаж байгаа бөгөөд 12 түр байгууламж барих юм.
Тус бүсэд хийгдэж байгаа бүх ажлуудыг НҮБ-ын конвенцын Нарийн бичгийн дарга нарын газар болон Аюулгүй байдлын газартай зөвшилцсөн байна.
Харин хувийн хэвшлийн оролцоонд тулгуурлах “Ногоон бүс”-ийн ажлыг эрчимжүүлэх, мөн хурлын танхим, тоног төхөөрөмжийн угсралтыг шуурхай эхлүүлэх шаардлага тулгарч байгааг төслийн гүйцэтгэгч байгууллагаас танилцуулав. Үргэлжлүүлэн тохижилт, хурлын танхимуудын угсралт, тоног төхөөрөмж суурилуулах гүйцэтгэгчийг шуурхай шалгаруулж, ажлыг зэрэг эхлүүлэх шаардлагатай байгааг онцолсон юм.
Ц.Сандаг-Очир сайд бэлтгэл ажлын чанар, хугацаанд онцгой анхаарч, холбогдох байгууллагуудад тулгамдсан асуудлыг шуурхай шийдвэрлэх, уялдаа холбоог сайжруулах, ажлыг зэрэг эхлүүлж хугацаанд нь бүрэн дуусгах чиглэл өгөв.
COP17 Талуудын бага хурал нь Монгол Улсын хувьд олон улсын тавцанд байгаль орчин, уур амьсгалын асуудлаарх манлайллаа харуулах, хамтын ажиллагааг шинэ шатанд гаргах чухал боломж юм.
Сэтгэгдэл (0)
Сэтгэгдэл бичигдээгүй байна