Цөлжилттэй тэмцэх тухай НҮБ-ын Конвенцын төлөөлөгчид Монгол Улсад гурав дахь удаагийн айлчлалаа хийж байна.
Айлчлалын үеэр НҮБ-ын Конвенцын Нарийн бичгийн газрын Тамгын газрын дарга Ражеб Булхаруф тэргүүтэй төлөөлөгчид СОР17 бага хурлын бэлтгэл ажлын хүрээнд төслийн талбайн ажлын явцтай танилцлаа. Төлөөлөгчид хурлын байгууламжийн техникийн шийдэл, өрөөний зохион байгуулалт, төлөвлөлтийн явцтай танилцаж, олон улсын стандарт, шаардлагад нийцүүлэх зөвлөмж өглөө.
Мөн төслийн талбайд ажиллах үеэр Байгаль орчин, уур амьсгалын өөрчлөлтийн яамны дэд сайд Б.Мөнхтамир, Төрийн ёслолын газрын дарга Э.Одмөнх нар өндөр, дээд түвшний төлөөлөгчдийн болон “Ногоон бүс”-ийн нэвтрэх хэсэг, ерөнхий зохион байгуулалт, ажлын төлөвлөгөөнд тусгах саналууд, мөн холбогдох үүрэг чиглэлийг Үндэсний хорооны Ажлын албанд өглөө.
Төслийн талбайн бүтээн байгуулалтын явцын тухайд, талбайн дэд бүтцэд холбох ажлууд бүрэн дууссан бөгөөд зам, талбай, зогсоолын ажлууд 2026 оны 3 дугаар сарын 15-аас эхлэн 65 хувийн гүйцэтгэлтэй байна. Харин байгууламжийн угсралтын ажлыг 6 дугаар сард багтаан дуусгахаар төлөвлөжээ.
Үүний зэрэгцээ тохижилт, хурлын танхимуудын угсралт, тоног төхөөрөмж суурилуулах гүйцэтгэгчийг шуурхай шалгаруулж, ажлыг зэрэг эхлүүлэх шаардлагатай байгааг төслийн гүйцэтгэгч байгууллагаас онцлон танилцуулж, уг асуудалд анхаарал хандуулахыг хүслээ.
Сэтгэгдэл (0)
Сэтгэгдэл бичигдээгүй байна