Монгол Улсын иргэд өнөөдрөөс /2024.03.07/ эхлэн Вьетнам Улс руу визгүй зорчдог болж байна. “Дипломат, албан болон энгийн паспорт эзэмшигчдийг визийн шаардлагаас харилцан чөлөөлөх тухай Монгол Улс, Бүгд Найрамдах Социалист Вьетнам Улсын Засгийн газар хоорондын хэлэлцээр”-ийн дагуу манай иргэд тус улсад 30 хүртэлх хоногийн хугацаанд визгүй зорчих боломжтой болсон. Харин 30-аас дээш хоногийн хугацаагаар зорчих бол виз авах шаардлагатай юм.
Тус улсад зорчиход анхаарах зүйлс:
• Гадаад паспортын хүчинтэй хугацаагаа шалгах
• Гадаад паспорт нь визийн тамга дарах хоёроос доошгүй хуудастай байх
• Аяллын хоёр талын тийз бичүүлсэн байх
• Бүгд Найрамдах Социалист Вьетнам Улсад байх хугацаагаа паспорт дээрээсээ нягтлан шалгаж, тухайн хугацаанд буцаж гарах, хууль тогтоомж, дүрэм журмыг нь сахиж мөрдөх
• Хилээр нэтрүүлэхийг хориглосон эд зүйлс, бараа, бүтээгдэхүүнийг биедээ болон ачаа тээшиндээ авч явахгүй байх
• Хилээр 5,000-аас дээш ам.доллар бэлнээр, эсхүл түүнтэй тэнцэх бусад гадаад валют авч яваа бол энэ талаар гаалийн мэдүүлэгт заавал мэдүүлэх (хэрэв гаалийн мэдүүлэгт мэдүүлээгүй бол гаалийн хууль тогтоомж зөрчсөн гэж үзэн, торгууль ногдуулдаг болохыг анхаарна уу)
• Зохион байгуулалттай гэмт бүлэглэлийн хохирогч болохоос урьдчилан сэргийлж, хэн нэгний гуйлт, ятгалгаар бусдын ачаа тээш, эд зүйлс авч явахгүй байх зэрэг
Сэтгэгдэл (0)
Сэтгэгдэл бичигдээгүй байна