ТРАМП ИРАНЫ ДЭЭД УДИРДАГЧ АЛИ ХАМЕНЕИ НАС БАРСАН ГЭЖ МЭДЭГДЭВ

Дональд Трамп Ираны дээд удирдагч Али Хаменеи нас барсан гэж мэдэгдлээ.

“Тэр бол түүхэн дэх хамгийн хорон муу хүмүүсийн нэг байсан. Энэ нь зөвхөн Ираны ард түмний төлөөх шударга ёс төдийгүй Агуу Америкчууд болон Хаменеи, түүний цуст бүлэглэлийн гарт амь үрэгдэж, эсвэл тахир дутуу болсон дэлхийн олон орны хүмүүсийн төлөөх шударга ёс юм” хэмээн Трамп Truth Social сүлжээнд нийтэлжээ.

Тэрбээр "Хаменеи манай тагнуул болон өндөр түвшний нарийн няналтын системээс зугтаж чадсангүй. Израилтай нягт хамтран ажилласны үр дүнд тэр болон түүнтэй хамт устгасан бусад удирдагчид юу ч хийж чадах боломж байгаагүй” гэжээ.

Ираны Исламын Хувьсгалт гвард (IRGC), цэрэг, аюулгүй байдал болон цагдаагийн хүчний олон хүн цаашид тулалдахыг хүсэхгүй, биднээс дархан эрх хүсэж байна гэж тэр дурджээ.  

Мөн АНУ-ын Ерөнхийлөгч “бөмбөгдөлт зорилгодоо хүрэх хүртэл энэ долоо хоногийн турш, цаашид шаардлагатай хугацаанд тасралтгүй үргэлжилнэ” гэж онцолсон байна.

Одоогоор Хаменеи нас барсан гэх мэдэгдлийг бие даасан эх сурвалжаар баталгаажуулаагүй байгаа бөгөөд Трамп энэ тухай ямар нэгэн нотолгоо танилцуулаагүй.

Трампын хэлснээр бямба гарагийн өглөө пуужин болон агаарын цохилтоор эхэлсэн цэргийн ажиллагааны зорилго нь дэглэм солих явдал аж. “Энэ бол Ираны ард түмэн эх орноо эргүүлэн авах хамгийн том боломж” гэж тэр бичсэн байна.

Израилийн Ерөнхий сайд Бенжамин Нетаньяху өмнө нь “Хаменеи амьд биш болсон олон шинж тэмдэг байна” гэж мэдэгдсэн бөгөөд Израилийн албаныхан түүний цогцсыг олсон гэж хэвлэлүүдэд мэдээлжээ.

Хаменеи нь Иранд улс төр, цэрэг, шашны ямар ч албан тушаалтнаас илүү нөлөө бүхий хүн байв. Хаменеи нас барсан тохиолдолд шашны удирдагчдаас бүрдэх Ираны “Мэргэжилтнүүдийн зөвлөл” шинэ дээд удирдагчийг сонгохоор хуралдах ёстой. Гэвч шинжээчдийн үзэж буйгаар хэт консерватив IRGC эрх мэдлийг төвлөрүүлэх боломж илүү байж магадгүй.

Цохилт эхэлснээс хойш Хаменеи олон нийтэд харагдаагүй бөгөөд хиймэл дагуулын зурагт түүний хамгаалалттай цогцолбор эхний довтолгоонд ноцтой гэмтсэн нь харагдсан байна.

Нетаньяху мөн Израилийн цохилтоор Ираны цөмийн хөтөлбөрт оролцсон “хэд хэдэн удирдагч” амиа алдсан бөгөөд цөмийн байгууламжуудтай холбоотой байршлуудыг ойрын өдрүүдэд үргэлжлүүлэн онилно гэж мэдэгджээ.

Ираны Гадаад хэргийн сайд Аббас Арагчи NBC News-т “Миний мэдэж байгаагаар Хаменеи болон Ерөнхийлөгч Масуд Пезешкиан нар амьд” гэж хэлсэн байна.

Трамп өмнөх мэдэгдэлдээ “Operation Epic Fury” ажиллагаа АНУ-ын аюулгүй байдалд заналхийлж буй эрсдэлийг эцэслэж, Ираны ард түмэнд “удирдагчдынхаа эсрэг босох” боломж олгоно гэжээ. Нетаньяху оройн мэдэгдэлдээ иранчуудад “гудамжинд гарч, ажлыг дуусгах”-ыг уриалсан байна.

Ираны хэвлэлүүдийн мэдээлснээр эхний довтолгоонд 201 хүн амиа алдаж, 747 хүн шархадсан бөгөөд тэдний дунд сургууль дээр байсан 80 гаруй хүүхэд багтжээ.

Трамп NBC-д өгсөн ярилцлагадаа “Бүх шийдвэрийг гаргадаг хүмүүсийн ихэнх нь байхгүй болсон” хэмээж, Ираны “удирдлагын ихээхэн хэсэг” мөн амиа алдсан гэжээ.

Ираны дээд удирдагчийн үхэл нь улс даяар олон давалгаат агаарын цохилтоор эхэлсэн АНУ–Израилийн хамтарсан ажиллагааны эхний томоохон амжилт болж байгаа бөгөөд Ойрх Дорнодыг тодорхойгүй хугацаа, үр дүнтэй шинэ бүс нутгийн мөргөлдөөнд татан орууллаа.

Ираны албаныхан АНУ-ын довтолгоонд гайхаагүй бөгөөд үр дагавар нь “урт хугацаанд, өргөн хүрээтэй байна" гэж анхааруулжээ. “Өмнө нь авч үзээгүй хувилбарууд ч багтсан бүх хувилбар ширээн дээр байна” гэж мэдэгдсэн байна.

Ираны Исламын Хувьсгалт Гвард бүс нутгийн бүх АНУ-ын бааз, ашиг сонирхолд заналхийлж, “дайсан шийдвэртэйгээр ялагдах хүртэл хариу цохилт" үргэлжилнэ гэж мэдэгдэв. Иран хариу арга хэмжээ болгон АНУ-ын баазууд, тухайлбал Бахрейнд байрлах АНУ-ын Тэнгисийн цэргийн тавдугаар флотын төв, Израилийн орон сууцны бүсүүд, мөн Персийн булангийн бусад улс дахь бай, түүний дотор Дубайн Fairmont зочид буудал болон Бахрейнд байрлах өндөр барилгад пуужин, дроны цохилт өгсөн байна.

АНУ-ын Төв командлал (CENTCOM) цэргийн хүчин Ираны хэдэн зуун пуужин, дроны довтолгооноос “амжилттай хамгаалсан” бөгөөд АНУ-ын талаас хохирол бүртгэгдээгүй гэж мэдэгдээд байгаа юм.

Трампын засаг захиргааны нэгэн өндөр албан тушаалтан Ираны баллистик пуужингийн хөтөлбөр нь бүс нутаг дахь АНУ болон түүний холбоотнуудын хувьд “тэвчихийн аргагүй” заналхийлэл болсон тул бямба гарагт цохилт өгөхөөр шийдсэн. Мөн Иран урьдчилсан довтолгоо хийхээр хэлэлцэж байсан тухай мэдээлэл байсан гэжээ.

 “Ираны аюул занал нь эцсийн дүндээ цөмийн зэвсэг эзэмших амбиц боловч ойрын хугацаанд АНУ болон бүс нутгийн холбоотнуудад заналхийлж буй зүйл нь тэдний уламжлалт зэвсэг, ялангуяа өмнөд бүс дэх пуужингийн чадавх юм” гэж тэр хэлээд “Ерөнхийлөгч бүс нутаг дахь Америкийн цэргүүдийг пуужингийн довтолгоонд өртөхийг зүгээр хараад суухгүй гэж шийдсэн.” гэсэн байна.