ЭХЭМҮТ-Д ЗҮРХНИЙ НЭЭЛТТЭЙ МЭС ЗАСЛЫН ТАСАГ НЭЭГДЛЭЭ

Эх хүүхдийн эрүүл мэндийн үндэсний төвд Зүрхний нээлттэй мэс заслын орчин үеийн тасаг өнөөдөр /2025.10.17/ үүдээ нээлээ.
Ингэснээр жилд 50 гаруй хүүхдийн амьдралыг аврах боломж, багадаа 40,000 ам.долларын гадаад эмчилгээний өртгийг дотооддоо шийдэх шийдэл бий болж байна.  

Эрүүл мэндийн яам, НҮБ-ын Хүн амын сан, Люксембургийн Засгийн газрын хамтын ажиллгааны хүрээнд төрөлхийн зүрхний гажигтай нярай хүүхдүүдийг цаг алдалгүй, хамгийн өндөр түвшний эрчимт эмчилгээгээр хангах боломж бүрдлээ. 

Манай улсад нярай хүүхдийн 2.4 хувь орчим нь төрөлхийн зүрхний гажигтай төрдөг,  тэдгээрийн дөрөвний нэг орчимд нь яаралтай мэс засал хийх шаардлагатай байдаг. Жилд дунджаар 50 гаруй нярай, бага насны хүүхэд зүрхний мэс засал хийлгэхээр гадаад улсыг зорьдог бөгөөд дундаж өртөг нь багадаа 15 мянгаас 40 мянган ам.доллар байдаг тул гэр бүлүүдэд санхүүгийн хүнд дарамт үүсгэдэг юм.

"Зүрхний гажигтай хүүхдүүдийн гэр бүл өмнө нь тун хязгаарлагдмал дотоодын тусламжийг хүлээх эсвэл өндөр өртөгтэй гадны улс руу явах гэсэн хүнд сонголттой тулгардаг байсан" хэмээн НҮБ-ын Хүн амын сангийн тэргүүн Халид Шарифи онцолжээ.

Энэхүү шинэ тасаг нь Монгол хүүхдүүдийн эрүүл мэнд, ирээдүйд оруулж буй түүхэн хөрөнгө оруулалт юм.