Эрүүл мэндийн сайд Ж.Чинбүрэн эмийн үнийг ил тод мэдээлэх системийн талаар өнөөдөр /2025.10.07/ мэдээлэл хийлээ.
Тус систем нь 2605 эмийн сан, 2565 эмийн үнийн мэдээллийг газар зүйн байршлаар иргэнд нээлттэй харуулах юм. Вэб сайт руу ороход шууд эмийн мэдээлэл гарч ирнэ. Жишээлбэл гээд хүмүүсийн өргөн хэрэглэдэг хоол шингээх зориулалттай "Мезимфорте" эмийг хэрэглэх заавар, хориглох зүйлс болон аль эмийн санд, ямар үнээр худалдаж байгааг харж болно гээд орж үзүүлэв.
Монгол Улс даяар 530 эмийн санд "Мезимфорте" худалдаалж байна. Улаанбаатар хотод хэдэн төгрөгөөр зарж байгааг харж болно гээд хамгийн хямдыг хайж үзүүлэхэд “Идэр угалз хайрхан” эмийн санд хамгийн хямд буюу нэг хайрцаг нь 7280 төгрөгөөр худалдаалагдаж байна. Хамгийн үнэтэй нь “Гүн ам” эмийн санд хамгийн үнэтэй буюу 11 мянган төгрөгөөр худалдаж байна гээд байршлыг харуулав.
Улаанбаатар хотод 386 эмийн сан байдаг. Тэдгээрт эмийг ямар үнээр борлуулж байгааг иргэд хянах боломж мөн бүрдэж байгааг онцлов. Нэгдсэн системийг нэвтрүүлснээр иргэд өөрийн хэрэглэх эмийг ямар эмийн санд, хэдээр худалдаж байгаа мэдээллийг цаг тутамд авах боломж бүрдэж байгаагаас гадна эмийн зааврыг ч харах боломжтой. Иргэн өөрт хэрэгтэй эмийг системээс хараад хаанаас авахаар шийдэхээс гадна эмийн сангууд ч энэ мэдээллийг харах тул ямар үнээр борлуулахаа бодно гэв.
Системийн хөгжүүлэлт үргэлжилж байгаа бөгөөд дараагийн шатанд улсын хилээр орсон бүх эм болон эмнэлгийн хэрэгслийг бүртгэх юм байна. Түүнчлэн эмийн хугацаа хэзээ дуусахыг мөн нэгдсэн системээр мэдээлэх ажээ.
https://em.hdc.gov.mn/ хаягаар нэвтрэн эмийн үнэ хаана хэдэн төгрөг байгааг та харж, мөн эмийн хэрэглэх заавар, хориглох зүйлстэй танилцаж болох юм.
Сэтгэгдэл (0)
Сэтгэгдэл бичигдээгүй байна