Г.Занданшатарын Засгийн газар 2025 оны зургадугаар сарын 18-нд байгуулагдаад 71 хонож байна. Зуны ид цаг зугаа цэнгэл, найр наадмын үе таарсан далаад хоногт Засгийн газар яг тоймтой хийж бүтээсэн зүйлийг иргэд төдий л мэдэхгүй байгаа. Төрийн албыг шинэчилнэ гээд зарим нэг төрийн өмчит компани, төрийн байгууллагатай холбоотой шийдэл гаргаж, Төгрөг нуурын ордыг төрд буцаан авахаа мэдэгдээд байгаа ч үр дүн нь яг түмний нүдэнд ил харагдаж амжаагүй л байна.
Гэтэл Засгийн газар дахиад л задарч магадгүй нөхцөл үүсэв үү. Засагт хамтарсан намуудын нэг Иргэний Зориг Ногоон намаас УИХ-д суугаа М.Нарантуяа-Нара гишүүн өчигдөр өөрийн цахим хаягтаа “Нэр төдий засагт хамтрах ажлыг больсон нь дээр гэсэн удаа дараагийн саналыг хүлээн авахаар болсон Иргэний Зориг Ногоон Намын дарга Батын Батбаатартаа баярлалаа. АН засгаас гарлаа л гээд байдаг, дүр эсгэж далдуур хамтраад бүх яаман дээрх чигжээсүүдээ шахсан хэвээр байхад дүр эсгэсэн шинэ хамтарсан засагт байх шаардлага манай ИЗНН лавтай байхгүй болно! Ер нь энэ яамнуудад тэр чигээрээ төрийн хулгай газар авсан байдаг бололтой юм. Салахгүй чаргууцалдан үхэлдэж амьтан хүн рүү хүний өөрийнгүй элдэв дарга нар яриулж байгаа АН-хан бол засгаас гарсандаа байж чадахгүй байж та нар нээх ардчилагчийн дүрд жүжицгээгээд яахав юм!” гэж бичсэн.
Нара гишүүн цахимд олон дагагчтай, хурцаар үзэл бодлоо илэрхийлдэг тул хүмүүс харсхийгээд өнгөрсөн байх. Гэтэл ИЗНН-ын дарга, Байгаль орчин, уур амьсгалын өөрчлөлтийн сайд Б.Батбаатар үүнийг шэйрлээд “Зөв магадгүй” гэсэн нь ИЗНН засгаас гарах юм байна гэсэн ойлголт олон нийтэд төрүүллээ.
Энэ талаар ИЗНН-ын холбогдох эх сурвалжуудаас тодруулахыг оролдсон ч намын дарга, Байгаль орчин, уур амьсгалын өөрчлөлтийн сайд Б.Батбаатар гадаад улсад томилолттой яваа гэнэ. Гэхдээ ИЗНН дээр энэ асуудал яригдсан бололтой. Ирэх долоо хоногийн даваа гаригт буюу есдүгээр сарын 1-нд ИЗНН Улс төрийн зөвлөлөө хуралдуулахаар болжээ. Хурлаар намын дотоод асуудал болон Г.Занданшатарын тэргүүлсэн Засгийн газартай ИЗНН хамтран ажилласны үр дүн, ажлын хэрэгжилт, цаашид авч хэрэгжүүлэх арга хэмжээг авч хэлэлцэх гэнэ.
Засгийн асуудал ийнхүү хамтарсан нэг намынх нь Улс төрийн зөвлөлийн “шүүлтүүрээр” орох нь ээ.
Л.Оюун-Эрдэнийн Засгийн газрыг МАН-ын Бага хурал шийдвэр гаргаж, огцруулах эх суурийг тавьсан. Харин одоогийн Засагт хамтарсан намынх нь Улс төрийн зөвлөл Засгаас гарах шийдвэр гаргавал юу болох бол... УИХ-д суудалтай 4 нам, нэг эвсэл бий. МАН АН-ыг Засгийн газраасаа “хөөн гаргасан” учир тэд дахин эвлэхгүй гэдэг нь тодорхой. Харин Номтойбаярын тэргүүлсэн Үндэсний эвсэл Г.Занданшатарын Засагт орох урилгаас татгалзсан. Хэрвээ ИЗНН-ын Улс төрийн зөвлөл Засгаас гарах шийдвэр гаргачихвал Г.Занданшатарын Засгийн газар орших эсэх асуудал тавигдаж эхлэх үү.
Тардаггүй юм аа гэхэд далаадхан хоноод хамтарсан нам нь гараад явах нь Засгийн газрыг тогтвортой бус харагдуулж, хэврэг, хүчгүй байдалд хүргэхэд нөлөөлж таарна.
Иргэний Зориг Ногоон намын Улс төрийн зөвлөл чухам ямар шийдвэр гаргахаас Засгийн газрын цаашдын хувь заяа шалтгаалах нь ээ.
Сэтгэгдэл (0)
Сэтгэгдэл бичигдээгүй байна