Эрүүл мэндийн даатгалын үндэсний зөвлөл Эрт илрүүлгийн тусламж үйлчилгээний төсвөөс найман тэрбум төгрөгийг татаж, хүүхдийн төрөлжсөн нарийн мэргэжлийн тусламж үйлчилгээнд зарцуулахаар болжээ.
Ийнхүү найман тэрбум төгрөгийг шийдвэрлэснээр Эх хүүхдийн эрүүл мэндийн үндэсний төвд 2025 оны наймдугаар сараас он дуустал архаг ангиллын улмаас тусламж авахаар хүлээгдэж буй 1250 орчим хүүхдийн мэс заслын тусламж, 1100 орчим хүүхдийн дотрын эмчилгээний тусламжийг үзүүлэх санхүүжилт хүрэлцээтэй болсон байна. Мөн хүүхдийн төрөлжсөн нарийн мэргэжлийн тусламж үйлчилгээнд квотын хязгаар тавихгүй байхаар шийдвэрлэжээ.
ЭХЭМҮТ -д жилдээ 40 гаран оношийн хамааралтай бүлгээр архаг ангиллаар 4,400 орчим мэс засал хийгдэж, 4,100 орчим хүүхэд эмэн эмчилгээнд эмчлүүлдэг.
0-18 насны хүүхдийн эрүүл мэндийн тусламж үйлчилгээг төр хариуцах хуулийн хүрээнд 2024 онд хөдөлмөрийн хөлсний доод хэмжээг 1 хувиар тооцож 137.7 тэрбум төгрөг даатгалын санд шилжүүлсэн ч эрүүл мэндийн тусламж үйлчилгээний зардал нь 211.8 тэрбум төгрөгт хүрч 70 гаруй тэрбум төгрөгийн алдагдалтай гарчээ.
Харин 2025 оноос эхлэн 1 биш 2 хувь болгож нэг хүүхдэд эрүүл мэндийн даатгалын шимтгэлд улсын төсвөөс Хөдөлмөр хөлсны доод хэмжэгээр тооцоход жилд 158,400 төгрөг төлж байна.
2025 оны эхний 6 сарын байдлаар 105,2 тэрбум төгрөгийг шимтгэлийн орлогод улсын төсвөөс олгосон бөгөөд эрүүл мэндийн даатгалын сангаас хүүхдийн лавлагаа шатлалын тусламж, үйлчилгээний зардалд 173,7 тэрбум төгрөгийг зарцуулж, Эрүүл мэндийн даатгалын сан 73 тэрбум төгрөгийн алдагдалтай байгаа юм.Дээрх нөхцөл байдлаас шалтгаалан хүүхдүүдэд квот тогтоох, хүлээгдэл үүсэх гэх мэт хүндрэл үүссэн байна.
Сэтгэгдэл (0)
Сэтгэгдэл бичигдээгүй байна