ӨНӨӨДӨР ДЭЛХИЙН БАЙГАЛЬ ХАМГААЛАГЧДЫН ӨДӨР

Өнөөдөр буюу долдугаар сарын 31-н Дэлхийн байгаль хамгаалагчдын өдөр. Энэ өдрийг байгаль хамгааллын ажлаа гүйцэтгэж яваад амь насаа алдсан, гэмтэж бэртсэн байгаль хамгаалагчдаа дурсах, тэдэнд хүндэтгэл үзүүлэх зорилгоор энэхүү өдрийг дэлхий нийтээр тэмдэглэн өнгөрүүлдэг уламжлалттай.

Байгаль хамгаалагч гэж хэн бэ?
• гал түймэр, хууль бус мод бэлтгэл, хууль бус агнуур зэрэг байгаль орчинд учирч болзошгүй аливаа аюулаас сэргийлэх,
• эргүүл хяналт хийх, хуулийн хэрэгжилтийг хангах,
• зэрлэг амьтны мониторинг судалгаа хийх,
• орон нутгийн ард иргэдтэй хамтран ажиллах үүргийг гүйцэтгэдэг байгаль хамгааллалын үйл хэрэгт хамгийн тэргүүн эгнээнд ажилладаг хүнийг хэлдэг.
Байгаль хамгаалагч наргүйгээр байгаль хамгааллын үйл хэргийг хөтлөн явуулах боломжгүй юм.

Байгаль орчин, уур амьсгалын өөрчлөлтийн салбарт өнөөдөр тусгай хамгаалалттай газрын хамгаалалтын захиргааны харьяанд 491 байгаль хамгаалагч, аймаг, нийслэлийн Байгаль орчны газрын харьяанд 456 байгаль хамгаалагч тус тус ажиллаж байна.

Дэлхийн байгаль хамгаалагчдын өдрөөр өнгөрсөн жилүүдэд байгаль хамгаалах үйлсэд ажиллаж байгаад амь насаа алдсан 41 орны 175 байгаль хамгаалагчдад хүндэтгэл үзүүлж байна. 

Байгаль хамгаалагчдад тулгарч буй эрсдэлүүд гүн гүнзгий хэвээр байна. Хүн амины хэрэг нь үхлийн гол шалтгаан (49) байсан бөгөөд ихэнх нь хямралын бүсэд ажиллаж байхдаа эсвэл хулгайн ан, зэвсэгт хүчнийхэнтэй тулалдаж байхдаа амь үрэгджээ. Бусад нь амьтдын дайралт (32), тээврийн хэрэгслийн осол (21), мэргэжлээс шалтгаалсан осол (36), албан үүргээ гүйцэтгэж байхдаа өвчний улмаас (37) амиа алдсан байна.

Энэхүү арга хэмжээ нь 2025 оны хувьд “Rangers, Powering Transformative Conservation” буюу Байгаль хамгаалагчид-Байгаль хамгааллын чанарыг шинэ түвшинд гаргана гэсэн уриатайгаар тэмдэглэгдэж байгаа бөгөөд байгаль хамгаалагчид зөвхөн хамгаалагч биш, харин өөрчлөлтийг бүтээгчид гэдгийг илэрхийлэх төдийгүй Тогтвортой хөгжлийн зорилт-2030 баримт бичгийн байгаль хамгаалах хамгийн том зорилтуудын нэг болох биологийн олон янз байдлын тогтолцооны 3-р зорилтыг хэрэгжүүлэхэд чухал ач холбогдолтой юм.