“Хөхөө гэрлэх дөхлөө” уран сайхны киног 1962 онд бүтээсэн. Киноны гол дүр Хөхөөд жүжигчин Батнасангийн Дашдаваа тоглож, монгол түмнийхээ мөнхийн танил болсон билээ.
Б.Дашдаваа нь Төв аймгийн Сэргэлэн сумын уугуул. Түүний тухай Ардын жүжигчин Г.Мягмарнаран ярихдаа “Нэг намын үзэл суртал,социализмын их хатуу дэглэмийн үед ёстой өөрийнхөө дур зориг, онгод авъяасандаа шатаж яваад, таарах таарахгүй юм болоод л хэрчигдсэн юм даа” гэж хэлсэн байдаг.
Тухайн үед Л.Жамсранжав, Ц.Гантөмөр, Б.Дашдаваа гээд нэгэн үеийн гурван сайхан царайлаг залуу жүжигчин байлаа. Охид хүүхнүүд тэдэнтэй мэндэлж, азтай нь зургаа авахуулдаг байж.
“Хөхөө гэрлэх дөхлөө”-д эхлээд Жамсранжавыг тоглоно гэж яригдаж байсан ч Дашдавааг сонгожээ. Энэ кинонд Сувдаагийн дүрийг бүтээсэн гавъяат жүжигчин А.Бүтэд “Би партнердаа гологдож байлаа. Үнэхээр намайг голохоор ч их сайхан залуу байсан” хэмээн инээмсэглэн ярьсан нь бий.
Драмын театраас халагдсан учрынх нь талаар Г.Мягмарнаран гуай ярихдаа “Эхнэрээсээ хэдэн сар тусдаа байсан юм. Тэрнээс салсан юм байгаагүй. Гэвч өөрөө их тод хүн байсан болохоор дээшээ доошоо, яам тамгад хүрдэг юм байлгүй дээ. Ингээд л Соёлын яамны намын хорооны дарга ирээд л Сайдын тушаал уншаад л ажлаас нь гаргачихсан юм. Үүний дараа Төв аймгийн театрт жүжигчнээр ч биш тайз засагчаар ажиллуулах болоход сэтгэлээр их унасан. Сүүлийн удаа багштайгаа уулзахад “Театраа л их санах юм. Жижүүр манаач ч болтугай хийгээд театртаа л баймаар байна гэж хэлж байсан” хэмээн өгүүлсэн байдаг.
Б.Дашдаваагийн төрсөн эгч Даваа гуай “Аав минь “Үргүй хүнийг үржүүлсний буян байдаг юм гэнэ лээ” гээд дүүг минь Батнасан гэдэг хүнийд өргүүлсэн юм. Хожим Төв аймгийн театрт ирэхдээ манайд ирдэг байлаа. Сүүлд “Дүү нь хот руу яваад орой ирнэ ээ гээд л гарсан. Тэр оройдоо “явчихсан” байсан” хэмээн гунигтай дурсав.
Б.Дашдаваа жүжигчний удмын үргэлжлэл жүжигчин Т.Энэрэл одоо Монголын урлагийн тайз дэлгэцнээ ур чадвараараа олон түмэнд үнэлэгдэж, хүлээн зөвшөөрөгдөж буй нэгэн билээ.
/Эх сурвалж: МҮОНТВ-ийн “Гэгээн үдэш” нэвтрүүлэг/
Сэтгэгдэл (0)
Сэтгэгдэл бичигдээгүй байна