Э.Даваажамц, Б.Буянхишиг нар Өвөрхангай амйгийн Бүрд суманд орших Монгол Улсын төв цэгт хүрэлцэн очиж, өмнөө тавьсан зорилгынхоо нэг шатыг биелүүлсэн талаар ахмад Д.Болор Зэвсэгт хүчний жанжин штабын цахим хуудаст бичжээ.
"МАРАФОНЧИД ЭХ ОРНЫХОО ТӨВ ЦЭГ БҮРД СУМАНД ХҮРЭЛЦЭН ИРЛЭЭ
Монголын Улсын дөрвөн зүгийн хязгаарт орших Соёмбот баганыг төв цэгтэй холбосон 5000 км замыг туулахаар 04 дүгээр сарын 02-ны өдөр Алтай таван богдын Сонгинотын даваанаас гараагаа эхлүүлсэн Зэвсэгт хүчний 123 дугаар ангийн хөгжимчин, цэрэгжлийн спортын мастер ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер, дэд ахлагч Б.Буянхишиг нар 05 дугаар сарын 04-ний энэ өдөр Өвөрхангай аймгийн Бүрд суманд хүрэлцэн ирлээ.
Тэд Баян-Өлгий, Ховд, Говь-Алтай, Баянхонгор, Өвөрхангай гэсэн таван аймгийг хөндлөн туулж, энэ өдөр Монгол Улсын төв цэгт ирж, өмнөө тавьсан зорилгынхоо нэг шатыг нь биелүүллээ. Эх орныхоо чулуу бүрийг мэдэрч гүйсээр төв цэгийн “Соёмбо” суваргын дэргэд ирэхэд 1525 км замыг туулсан байна.
Марафон гүйгчид үргэлжлүүлэн Улаанбаатар хотын чиглэлд гүйх бөгөөд тэднийг замд нь буюу Булган аймгийн Рашаант сумын зааг дээр хурандаа Г.Мөнхбат захирагчтай Зэвсэгт хүчний 234 дүгээр ангийнхан угтах авах мэдээлэл байна. Учир тус ангийн эмэгтэй цэргийн алба хаагч гүйж байгаатай холбогдуулан анги хамт олноороо дэд ахлагч Б.Буянхишиг болон түүний хамтран гүйгч ахлах ахлагч Э.Даваажамц нарт урам зориг өгч, амжилт хүсэхээр тов тогтоожээ.
Ташрамд дурдахад, Монгол орны төв цэгийн байршлыг 1979 онд газар зүйн шинжлэх ухааны эрдэмтэн Ш.Шагдар Өвөрхангай аймгийн Бүрд сумын төв дэх "Онгон" гэдэг газраас урагш 13.5 км зайд Сант уулын өвөр Өвөр хөшөөтийн булаг гэдэг газар гэж тодорхойлжээ. Эрдэмтэн, профессор үүнийг нотлохдоо газар зүйн солбилцлын арга, тэгш өнцгийн арга, квадратын болон тойргийн аргаар тодорхойлж, хойд өргөргийн 46 градус 52 минут, зүүн уртрагийн 103 градус 50 минутын солбилцолд далайн түвшнээс 1690 метрт өргөгдсөн талбайд манай орны зүүн, баруун захаас адилхан 1219.5 км-т, хойт захын цэгээс 690 км, өмнөд цэгээс 600 км-т орших уг булгийг гэж үзжээ.
Ахмад Д.БОЛОР" гэсэн байна.
Сэтгэгдэл (0)
Сэтгэгдэл бичигдээгүй байна