Улсын хоёрдугаар төв эмнэлэг Эд, эс, эрхтэн шилжүүлэн суулгах төв 2022 оноос Элэг шилжүүлэн суулгах мэс заслыг эхлүүлэхээр бэлтгэж ажлаа хийснээр 2025 оны 3-р сарын 8-нд Ерөнхийлөгч У.Хүрэлсүхийн ивээл дор Элэг шилжүүлэн суулгах мэс заслыг амжилттай хийжээ.
Тус мэс заслыг Улсын хоёрдугаар төв эмнэлгийн эмч нар Солонгосын Самсунг медикал төвийн Эрхтэн шилжүүлэн суулгах төвийн профессор Ким Жонгман, түүний баг, Улсын нэгдүгээр төв эмнэлэг болон Хавдар судлалын үндэсний төвийн элэг шилжүүлэн суулгах төвийн эмч нарын зөвлөмжтэйгээр амжилттай хийсэн байна. Эрхтэн шилжүүлэн суулгах мэс засал хийгдсэн үйлчлүүлэгчийн биеийн байдал сайжирч, эмнэлгээс гарч дараагийн хяналтанд шилжжээ.
Уг мэс заслын онцлог нь донорын элгийг дурангийн мэс заслын аргаар авч шилжүүлэн суулгасан нь Монгол Улсад 3 дахь тохиолдол болсноороо эрхтэнээ бэлэглэж буй эмчлүүлэгчид зовуурь бага, эдгэрэлт хурдан, хөнөөл багатай байсан байна.
Элэг шилжүүлэн суулгах мэс заслыг Улсын хоёрдугаар төв эмнэлэг хийж эхэлснээр Монгол Улсад тулгамдаж буй элэг шилжүүлэн суулгах мэс заслын хүлээгдэл багасаж, гадаад орон руу зорих урсгалыг төдий чинээгээр бууруулж, эх орондоо дэлхийн чанартай тусламж үйлчилгээг авах олон давуу талууд бүрдэж байгаа юм.
Цаашид Улсын хоёрдугаар төв эмнэлэг элэг шилжүүлэн суулгах мэс заслаас гадна ойрын ирээдүйд Бөөр шилжүүлэн суулгах мэс заслыг хийхээр бэлтгэж ажлаа үргэлжлүүлж байна.
Сэтгэгдэл (0)
Сэтгэгдэл бичигдээгүй байна