Улсын хэмжээнд 2025 оны 3 сарын 29-ний өдрийн байдлаар менингококкт халдварын батлагдсан 4 тохиолдол, үүнээс Улаанбаатарт 3, Архангайд 1 бүртгэгдэж, 2 нас баралт бүртгэгджээ. Насны хувьд 3-5 хүртэлх насны хүүхдүүд байна. Өнөөдрийн /2025.03.29/ байдлаар эмнэлэгт эмчлэгдэж буй тохиолдол байхгүй байна.
ХӨСҮТ-ийн ерөнхий захирал Э.Анхбаяр “Сэлэнгэ аймгийн Мандал суманд менингококкт халдвараар өвдсөн хүүхэд нас барсан гэдэг мэдээлэл нь одоогоор тус халдвараар өвдөж улмаар эндсэн гэдэг нь батлагдаагүй бөгөөд лабораторийн шинжилгээ хийгдэж байна. Өөрөөр хэлбэл ХӨСҮТ-д сэжигтэй тохиолдлоор бүртгэгдсэн бөгөөд эд эсийн шинжилгээгээр эцсийн хариу гарна” хэмээн мэдээлжээ.
Улсын хэмжээнд менингококкт халдварын эсрэг 2000 тун вакцин татан авч хавьтлуудын ойрын хүрээллийг дархлаажуулж байна. Менингококкт халдварын вакцин товлолт бус тархвар зүйн вакцин буюу халдвар гарсан үед хийгддэг вакцин юм.
Сүүлийн 10 жилийн хөдлөл зүйгээс харахад жилд дунджаар энэхүү халдварын ойролцоогоор 8 тохиолдол, 2 нас баралт бүртгэгддэг үзүүлэлттэй байна.
Менингококкт халдварын тохиолдол бүх насныханд бүртгэгдэж байгаа ч нийт өвчлөлийн 80-85 орчим хувийг 0-4 настай хүүхдийн өвчлөл эзэлдэг аж. Нийгмийн байдлаар авч үзэхэд нийт өвчлөгсдийн 77 хувь нь нь гэртээ, 15 хувь нь цэцэрлэгт, 8 хувь нь сургуульд хамрагддаг хүүхдүүдийн дунд бүртгэгдсэн байна.
Өвчлөл 2 дугаар сараас 4 дүгээр саруудад харьцангуй өндөр бүртгэгддэг зүй тогтол ажиглагддаг Мөн нас барсан тохиолдолд хийсэн судалгаагаар эрүүл мэндийн байгууллагад 60-70 хувь нь 24 цагаас дээш болсон хугацааны дараа буюу оройтож хандаж байгаа шалтгаан голлож байна.
Эх сурвалж: Эрүүл мэндийн яам
Сэтгэгдэл (0)
Сэтгэгдэл бичигдээгүй байна