П.БАТЧУЛУУН ЭМЧИЙГ ГЭМТ ХЭРЭГ ХИЙСЭН ГЭЖ БОДОХГҮЙ БАЙГАА, БИЕИЙН БАЙДАЛ НЬ ТУН ХҮНД БАЙНА

УНТЭ-ийн О.Сэргэлэн ахлагчтай Элэг шилжүүлэн суулгах багаас тархины үхэлтэй донороос эртхэн шилжүүлэн суулгах эмчилгээний нөхцөл байдал болон П.Батчулуун эмчтэй холбоотой асуудлаар мэдээлэл хийлээ. Хэвлэлийн хуралд П.Батчулуун эмчийн өмгөөлөгч Э.Ганбат мөн оролцсон юм.

Мэдээллээс зарим зүйлийг онцолвол: 

• 2011 онд элэг шилжүүлэн суулгаж эхэлснээс хойш 306 хүнд элэг шилжүүлэн суулгаад байна. Үүнээс ердөө 5 хувьд нь буюу 17 хүнд л тархины үхэлтэй донороос элэг шилжүүлэн суулгаад байна. Монгол Улс улс 2023,2024 онд нэг сая хүнд ногдох амьд донороос элэг шилжүүлэн суулгасан тоогоороо дэлхийд нэгд орж байна. 
• ДЭМБ-аас амьгүй донороос элэг шилжүүлэн суулгавал цаана нь бас нэг эрүүл хүний эд эрхтэнг  хөндөхгүй давуу талтай гэж үздэг. Гэтэл энэ үзүүлэлт манайд хангалтгүй байгаа юм. 
• 2018 онд Эрүүл мэндийн хөгжлийн төвд Эд, эс, эрхтэн шилжүүлэн суулгах үйл ажиллагааг зохицуулах алба байгуулсан. Алба байгуулагдсанаас хойш талийгаач болсон 270 гаруй хүний ар гэрт санал тавьснаас 31 ар гэр л зөвшөөрсөн. 
• Элэгний үйл ажиллагаа нь эргэшгүй өөрчлөлтөд орсон 430 хүнд донор олдохгүй, амь гуйгаад байж байна. Сүүлийн гурван жилд донорын жагсаалтад байсан 30 гаруй хүн донор олдохгүйгээс нас барсан. 
• П.Батчулуун эмчтэй холбоотой асуудал гарснаас хойш тархины үхэлтэй донорын асуудал байхгүй болсон. Энэ үйл ажиллагаа зогсоод байна.
• Тархины үхэл гэж тархины үйл ажиллагаа эргэж сэргэхгүй, үхэжсэн байдлыг хэлдэг. 
• Донорын эрхтнийг авахдаа тэр эрхтнийг бүрэн чөлөөлж сулладаг. Жишээ нь, элгийг цөсний хүүдийн хамт, бөөрийг шээлгүүрийн хамт, шөрмөсийг ясны эдийн хамт авах дарааллаар явагддаг. Маш хурдан хугацаанд, тухайлбал элгийг 6 цагийн хугацаанд шилжүүлэн суулгах ёстой байдаг тул тухайн өвчтөн байгаа эмнэлэг дээр ирж, шилжүүлэн суулгадаг. 
• П.Батчулуун эмчид холбогдох хэргийн  тохиолдлын хувьд Дээд шүүх авч хэлэлцэх хуулийн зохицуулалт байна гэж харж байна. Эрх зүйн шинэ ойлголт, хууль хэрэглээг тогтооход зарчмын нийтлэг ач холбогдолтой хэргийн асуудлаар гомдол гаргасан байвал Дээд шүүх авч хэлэлцэх хуулийн зохицуулалттай. 2002 онд Эрүүгийн хуульд хүний эд эрхтнийг хууль бусаар авахыг гэмт хэрэг гэж үзэхээр анх удаа хуульд орсон. Түүнээс хойш 22 жилийн хугацаанд ийм хэрэг шүүхээр нэг ч шийдвэрлэгдээгүй. Тийм учраас Дээд шүүх шинэ тохиолдлыг авч хэлэлцэж, шүүхийн пратктик тогтоно. Тиймээс бид Дээд шүүхэд гомдлоо гаргана. Хууль зүйн болон шинжлэх ухааны үндэслэлтэй авч хэлэлцэж, шийдэх байх гэж найдаж байна.  
• П.Батчулуун эмчийн биеийн байдал өнөөдөр тун муу, сэтгэл санаа маш хүнд байна. Суурь өвчин ихтэй. 2013 онд Батчулуун эмч Донорын хуулийн хэлэлцүүлэг хийх гээд хурал зарласан байхад гэнэт ухаан алдаж, зүрх нь зогссон. Эмнэлэг дээр байсан тулдаа яаралтай сэхээн амьдруулах үйл ажиллагаа явуулснаар 16 минутын дараа сэргэсэн. Таван удаа зүрхний гол судсанд тэлэгч тавиулсан. Өнөөдөр зүрхний үйл ажиллагааны ажиллах хувь нь 33 хувьтай байна. Эрүүл мэнд ийм хүнд байдалд байгаа хүн өнөөгийн хууль шүүхийн маргааныг тэсэж гарна гэдэг хүнд. 
• П.Батчулуун эмчийг бид гэмт хэрэг хийсэн гэж бодохгүй байгаа. 
• 31 донороос 27 хүнд элэг, 45 хүнд бөөр шилжүүлэн суулгасан. Элэг бөөр шилжүүлэн суулгуулсан хүмүүс бүгд эсэн мэнд, эрүүл энх, аз жаргалтай, сайхан амьдарч байгаа.