Улсын гуравдугаар төв эмнэлгийн гол судасны мэс заслын баг цээжний гол судасны цочмог хуулрал, Станфордын ангилал А, ДеБекей I хэлбэрийн эмгэгтэй, гол судасны хавхлагын цочмог хүнд зэргийн дутмагшил оноштой 51 настай эмчлүүлэгчид цусны зохиомол эргэлтийн гүн хөргөлтийн нөхцөлд тархины сонгомол перфузийн дор гол судасны өгсөх хэсэг, нум хэсгийн хууларсан цүлхэнг устгаж, хиймэл судсаар өгсөх болон нумын хэсгийг бүрэн солих мэс заслыг амжилттай хийжээ.
Мөн гол судасны нумын цочмог хуулрал, титэм судасны хоёр салааны хүнд хэлбэрийн нарийсалтай 65 настай эмчлүүлэгчид гол судасны нумыг бүрэн сольж, баруун титмийн артерийн салаа болон ховдол хоорондын уруудах салааны титэм судаснуудыг хиймэл судсаар нэг зэрэг залгах мэс заслыг амь насны заалтаар яаралтай журмаар хийсэн байна.
Эмчлүүлэгчдийн биеийн байдал сайжирч, эмнэлгээс гаран дараагийн шатны эмчийн хяналтад шилжжээ.
2024 оны 4-р улирлаас эхлэн Монгол Улсад эмчлэгдэх боломжгүй 26 бүлэг өвчин эмгэгийн оношилгоо, эмчилгээг эх орондоо бүрэн нутагшуулах зорилгоор бодит үйл ажиллагаануудыг эрчимтэй хэрэгжүүлж эхлүүлсэн билээ. Энэхүү үйл ажиллагааны хүрээнд гадаад улсад зайлшгүй эмчлүүлэх өвчний жагсаалтад багтаж буй “Гол судасны хүнд хэлбэрийн цүлхэн, цүлхэнгийн хуулрал”-ын мэс заслын эмчилгээг бүрэн нутагшуулахаар Улсын гуравдугаар төв эмнэлгийн зүрх судасны мэс заслын гол судасны мэс заслын багийг БНСУ-ийн Йонсей Северанс эмнэлэг, Сөүлийн үндэсний их сургуулийн эмнэлгийн Бунданг салбар эмнэлгүүдэд нэг сарын хугацаатай дадлагажуулах сургалтад хамруулсан юм.
Дээрх гадаад сургалтад хамрагдсан тус эмнэлгийн гол судасны мэс заслын багийн мэргэжилтнүүд өндөр хөгжилтэй улсад эзэмшсэн мэс заслын орчин үеийн арга техник, ур чадвараа ашиглан эмнэлзүйн практикт богино хугацаанд бодит үр дүн гаргаж эхэлсэн нь энэ аж.
Гадаад сургалтын үр дүнд эмч мэргэжилтнүүд цээжний гол судасны цүлхэн болон зүрхний бусад эмгэгийн үед цусны зохиомол эргэлтийн технологи ашиглан хиймэл судсаар солих мэс засал, гол судасны нумыг хиймэл судсаар солих мэс заслыг бусад зүрхний нээлттэй мэс заслуудтай хавсран гүйцэтгэх технологуудыг ийнхүү өөрийн эх орондоо амжилттай хийж нутагшуулаад эхэлсэн байна.
Цаашид цээж - хэвлийн хавсарсан хүнд зэргийн цүлхэнг болон цүлхэн хуулралын эмгэгийг цусны зохиомол эргэлтийн нөхцөлд хиймэл судсаар бүрэн солих висцераль эрхтэнүүдийн эргэн судасжуулах мэс засал хийгээд хэвлийн гол судасны супрареналь хэсгийг хамарсан хүнд зэргийн цүлхэнгийн үед цээж хэвлийн хавсарсан хүрцээр хиймэл судсаар солих чацархайн болон бөөрний судсуудыг эргүүлэн суулгах мэс заслуудыг нутагшуулах, насанд хүрэгсдийн зүрхний мэс засалд Дель Нидо кардиоплегийн зүрх хамгаалах уусмалыг нэвтрүүлэхээр зорин ажиллаж байна.
Сэтгэгдэл (1)