​НАЛАЙХ ДҮҮРЭГТ МЕНИНГОКОККТ ХАЛДВАРЫН НЭГ ТОХИОЛДОЛ БҮРТГЭГДЖЭЭ

Налайх дүүрэгт менингококкт халдварын нэг тохиолдол өчигдөр /2025.01.29/ бүртгэгджээ.

Тухайлбал тус дүүргийн 307 дугаар цэцэрлэгийн нэг хүүхдэд менингококкт халдвар илэрч, халуурсан бөгөөд эмнэлэгт хүргэсэн, биеийн байдал нь хүнд байна. 

Дүүргийн Онцгой комисс яаралтай хуралдаж, тухайн тохиолдлын хавьтлуудыг илрүүлэн шинжилгээ авч,  зөвлөмжүүдийг өгчээ. Мөн дүүргийн сургууль цэцэрлэгүүдэд халдваргүйтэл хийсэн аж. 

Түүнчлэн тус дүүргийн Голомт сургуулийн Бага сургууль, болон 160 дугаар сургууль, 307 дугаар цэцэрлэгийг өнөөдрөөс /2025.01.30/эхлэн хичээл сургалтын үйл ажиллагааг цахим хэлбэрт шилжүүлсэн.

Эрүүл мэндийн яам, Халдварт өвчин судлалын үндэсний төв, Нийслэлийн эрүүл мэндийн газар, дүүргийн онцгой комисс ажиллаж тандалт судалгаа хийж байгаа юм байна. 

МЕНИНГОКОККТ ХАЛДВАР нянгаар үүсгэгддэг бөгөөд халдвар авсан хүнд эмнэл зүйн шинж тэмдэг 24 цагийн дотор хурдан илэрч эмчилгээ хожимдвол хурдан хүндэрдэг.

Халдварын үед дараах шинж тэмдэг илэрнэ.

• Өндөр халуурах
• Бөөлжих
• Толгой өвдөх
• Нойрмоглох
• Цусархаг тууралт гарах
• Гэрэлд цочимтгой болох
• Дагз хөших
• Таталт өгөх