Ерөнхий боловсролын сургуулийн ахлах ангийн сурагчдад санхүүгийн суурь мэдлэг олгох замаар ирээдүйд санхүүгийн зохистой шийдвэр гаргадаг, эрсдэлийг үнэлэх чадвартай иргэнийг бий болгож төлөвшүүлэх, зөв дадал, чадварт суралцахад нь сургууль, багш нарын үүрэг, оролцоо, манлайллыг дэмжих, зорилготой “LEVEL-UP хөтөлбөрийн нээлт Говь-Алтай аймагт боллоо. Хөтөлбөрийн нээлтэд Санхүүгийн зохицуулах хорооны дарга Т.Жамбаажамц, Монголбанкны ерөнхийлөгч Б.Лхагвасүрэн, Боловсролын ерөнхий газрын дарга Т.Ням-Очир, Говь-Алтай аймгийн Засаг дарга Г.Чинбат болон холбогдох албаны бусад хүмүүс оролцов.
Санхүүгийн зохицуулах хорооны дарга Т.Жамбаажамц нээж хэлсэн үгэндээ ”Сүүлийн жилүүдэд Монгол Улсын төрөөс бүх насны иргэдийн санхүүгийн боловсролыг дээшлүүлэх чиглэлд анхаарч, үе шаттай арга хэмжээг эрчимтэй хэрэгжүүлж байгаа ба үүний нэг нь энэ хөтөлбөр юм. Энэхүү хөтөлбөр нь ирээдүйд өөрийн хүч хөдөлмөрөөрөө бий болгосон санхүүгээ зөв удирдаж, хуримтлалтай, эрсдэл багатай хөрөнгө оруулалт хийж чаддаг, ингэснээр өөрийгөө болон гэр бүлдээ учирч болох аливаа эрсдэлээс сэргийлэх чадвартай, санхүүгийн хувьд ирээдүйдээ итгэлтэй ийм л иргэн болгож төлөвшүүлэхэд гол ач холбогдол оршиж байгаа. Сүүлийн жилүүдэд санхүүгийн бүтээгдэхүүн, үйлчилгээнүүд цахим технологид суурилан орон зай, цаг хугацааг үл харгалзан хүн бүрт хүрэх болсон. Гэхдээ технологийн энэ дэвшил нь нөгөө талаар санхүүгийн залилан, луйвар, тэр дундаа өсвөр насны залуучуудын санхүүгийн мэдлэг, мэдээлэл дутмаг байдлыг ашиглаж гэмт хэргийн хохирогч болгох явдал ихсэж байна. Иймд санхүүгийн луйварт өртөхгүй байж, өөрийгөө хамгаалах чадвартай болохын тулд хөтөлбөрийн хүрээнд заагдах сургалт, хичээлийг хичээнгүйлэн сонирхож, шамдан суралцаасай гэж хүсэж байна. Мөн манай байгууллагын фэйсбүүк, инстаграм, твиттер зэрэг олон нийтийн цахим сүлжээнээс санхүүгийн бүтээгдэхүүн, үйлчилгээний танилцуулга, санхүүгийн гэмт хэргийг хэрхэн таних, өөрийгөө яаж хамгаалах талаар дэлгэрэнгүй мэдээлэл авч болно. Цаашилбал хөрөнгийн зах зээл, даатгал, хадгаламж, зээлийн хоршоо, банк бус санхүүгийн байгууллага, виртуал хөрөнгийн үйлчилгээ үзүүлэгчийн талаарх мэдээ, тойм, судалгааны материалыг олон нийтэд ил тод байдлаар хүргэдэг тул энэ чиглэлд илүү гүнзгийрүүлж судалж сонирхох бүрэн боломжтой” гэдгийг онцолсон юм.
УИХ-ын даргын Ажлын алба, Санхүүгийн зохицуулах хороо, Монголбанк, Боловсролын ерөнхий газар хамтран зохион зохион байгуулж буй энэ хөтөлбөрт Улаанбаатар хот болон Говь-Алтай, Орхон, Булган, Ховд аймгийн ахлах ангийн сурагчид хамрагдаж байгаа юм. Ирэх зургаадугаар сарын 15-н хүртэл үргэлжлэх хөтөлбөрийн хугацаанд сурагчид санхүүгийн боловсролын үндсэн ойлголтуудыг мэдэж, өдөр тутмын санхүүгээ зохистой төлөвлөх, зарцуулалтаа хянах, эрсдэлээс хамгаалах, урьдчилан сэргийлэх аргад суралцах замаар санхүүгийн зөв соёл, зан үйлд суралцах юм.
Сэтгэгдэл (0)
Сэтгэгдэл бичигдээгүй байна