Эрүүл мэндийн сайд Т.Мөнхсайхан БНТУ-д ажиллах үеэрээ тус улсад ажиллаж амьдардаг 30 гаруй монгол эмч нарын төлөөлөлтэй уулзаж, нээлттэй яриа өрнүүлжээ.
Монгол Улсад эмчлэгддэггүй өвчлөлийг бууруулах бодлогын хүрээнд хийж хэрэгжүүлж буй ажлаа Т.Мөнхсайхан сайд танилцуулж, гадаадад суралцаж, ажиллаж буй эмч нараа эх орондоо ажиллах орчин нөхцөлийг бүрдүүлэхээр ажиллаж буйгаа онцолсон байна.
Харин эмч нарын тухайд Монгол Улсад эмчлэгддэгүй өвчлөлөөр БНТУ-ыг зорин ирж буй эмчлүүлэгчид эмчилгээ хийлгэх эмнэлгээ сайтар судлаагүйн улмаас санхүүгийн болон эмчилгээний хохирол амсах эрсдэлтэй байдаг тухай, Эрүүл мэндийн сайдын салбартаа хийж буй бодлого, үйл ажиллагааг дэмжиж буйгаа хэлжээ. Эдгээр эмч нараас эх орондоо ирж ажиллах төлөвлөгөөтэй хүмүүс нэлээд байгаа бөгөөд тодорхой хугацааны туршлагыг хуримтлуулаад эх орондоо ирж ажиллахыг хүсэж буйгаа илэрхийлсэн юм.
Эрүүл мэндийн сайдын тухайд гадаадад ажиллаж амьдарч буй эмч мэргэжилтнүүдээ эх орондоо ажиллаж амьдрах боломж нөхцөлийг бүрдүүлэхэд анхааран ажиллаж байна.
Уулзалтын төгсгөлд БНТУ-ын хувийн болон улсын эмнэлэгт ажиллахаас гадна БНТУ-д ажиллаж амьдардаг эх орон элэг нэгтнүүддээ эрүүл мэндийн тусламж үйлчилгээ үзүүлдэг эмч нарын төлөөллийг төрийн одон медаль болон салбарын шагналаар шагнаж урамшуулжээ.
Сэтгэгдэл (0)
Сэтгэгдэл бичигдээгүй байна