Улсын хэмжээнд томуу, томуу төст өвчин 10,000 хүн амд 60,4 (-5,3) тохиолдол бүртгэгдэж, алаг цоог дэгдэлтийн түвшинд, амсгалын замын цочмог халдвар 10,000 хүн амд 7,3 (-0.3) тохиолдол бүртгэгдэж, алаг цоог дэгдэлтийн түвшинд тус тус байна.
Ерөнхий боловсролын сургуулийн суралцагчдын I улирлын амралт дууссан, мэргэжлийн болон техникийн боловсрол, дээд боловсролын сургалтын байгууллагуудын хичээл, сургалтын үйл ажиллагаа эхэлж байгаатай холбогдуулан Улсын Онцгой комисс, Шуурхай штабын хуралдаанаас өгсөн үүрэг чиглэлийн дагуу Эрүүл мэндийн яам, Боловсролын яамны Төрийн нарийн бичгийн дарга нар хамтарсан уулзалт өчигдөр /2025.01.20/ зохион байгуулж, авч хэрэгжүүлэх хариу арга хэмжээний талаар ярилцсан.
Эрүүл мэндийн яамны Төрийн нарийн бичгийн дарга Д.Очирбат оюутан, суралцагчдын амралтын үеэр ТТӨ болон амьсгалын замын цочмог халдварын тохиолдол 50 хувиар буурсан, иймд хичээллэх хэлбэр, суралцагчдын амралтын хуваарийг өөрчлөх шаардлагагүй болохыг онцолжээ. Харин хичээл, сургалтын үйл ажиллагаа эхлэх үед буцаад дэгдэлт нэмэгдэх тул үүний хариу арга хэмжээ авахад талууд анхаарч, төлөвлөгөө гарган, зөвлөгөө мэдээллийг эрчимжүүлнэ гэсэн байна.
Өөрийгөө болон бусдыг хамгаалах хамгийн сайн арга нь "Амны хаалт хэрэглэх" тул хүйтний эрч сулраагүй, агаарын бохирдол их байгаа энэ үед бүх түвшний боловсролын сургалтын байгууллагын багш, суралцагч, ажилтан, албан хаагчдыг амны хаалт хэрэглүүлж хэвшүүлэхэд дэмжлэг үзүүлж, мэргэжлийн байгууллагаас өгөх зөвлөмж зааврыг дагаж ажиллахыг зөвлөж байна.
Сэтгэгдэл (0)
Сэтгэгдэл бичигдээгүй байна