Жил бүрийн нэгдүгээр сарын 3-ны өдрийг Цус сэлбэлт судлалын үндэсний төвөөс Цусаа бэлэглэх үндэсний өдөр болгон тэмдэглэж байхаар тогтсон бөгөөд энэ онд найм дахь удаагаа амжилттай тэмдэглэн өнгөрүүлжээ.
Уг томоохон арга хэмжээний хүрээнд донор Б.Өлзийдэлгэр, Б.Идэрболд, Б.Батнэрэн, А.Батболд нарт ХҮНДЭТ ДОНОР цол тэмдгийг гардуулж алдаршуулсан байна.
Мөн 100 удаа цусаа бэлэглэсэн донор Ц.Өлзийхишиг, Д.Ган-Очир нарт МӨНГӨН ДОНОР, С.Дарамбазар, Д.Сарантуяа нарт ХҮРЭЛ ДОНОР цол хүртээжээ.
Мөн НИГҮҮСЭЛ алтан медалиар Ж.Нарантуяа, НИГҮҮСЭЛ мөнгөн медалиар Н.Ганзориг нарыг тус тус шагнаж урамшуулсан байна.
Монгол зурхайн Түвдэнпэлжээлин хийдийн Ловон лам, донор Д.Ган-Очир МӨНГӨН ДОНОР цол, тэмдгээ гардаж авсан бөгөөд тэрбээр 2010 оноос эхлэн цусаа өгч байгаа идэвхтэй донорын нэг юм.
Д.Ган-Очир "Анх 15 жилийн өмнө Улсын нэгдүгээр төв эмнэлгийн хажуугаар явж байтал "Таны нэг удаа бэлэглэсэн цус 3 хүний амийг аварна" гэсэн зурагт хуудас анхаарал татсан. Цусны төв яг хажууханд нь харагдав. Шууд л ороод "Би цусаа өгч болох уу" гэж асуулаа. Тэр цагаас хойш тасралтгүй 15 дахь жилдээ цусаа өгч байна даа" гэж яриад "Бусдад туслах нь хамгийн сайн үйл хэрэг бөгөөд энэ чинь л буян шүү дээ" гэсэн байна.
Сэтгэгдэл (0)
Сэтгэгдэл бичигдээгүй байна