Амралтын өдрүүдэд Эх хүүхдийн эрүүл мэндийн үндэсний төв, Эх нярай эмэгтэйчүүдийн үндэсний төвийн ачаалал огцом нэмэгдэж байна. Эрүүл мэндийн сайд үүрэг өгснөөр тус яамны баг харьяа эмнэлэг хооронд хүүхэд хүлээн авах зохион байгуулалтыг хийж, өрөөний дотоод шилжилтийг шахан, орны тоог нэмснээр Эх нярай эмэгтэйчүүдийн үндэсний төвд коридорт хэвтэн эмчлүүлж байсан бүх хүүхдийг өрөөнд оруулан эмчилж эхэлжээ.
ЭМЯ-ны эмнэлгийн тусламжийн бодлогын газрын дарга Р.Гантуяа " Бид Эх нярай эмэгтэйчүүдийн үндэсний төв дээр ажиллаж 18 цагийн байдлаар тасгаа чөлөөлөн, ариутгаж цэвэрлээд 99 орон дээр 83 хүүхэд авлаа. 16 ор сул үлдсэн. Ирэх пүрэв гариг буюу 12 дугаар сарын 26-наас эхлэн Хүүхдийн сэргээн засах Хан-Уул төв эмнэлэг рүү Эх нярай эмэгтэйчүүдийн үндэсний төвийн хүндэвтэр хүүхэд авахаар боллоо. Энэ хугацаанд эм тариа хэрэгсэл нөөцийн бэлэн байдлаа хангана. Мөн ЭНЭҮТ-ээс Сонгинохайрхан дүүргийн 30 дугаар хороог тус дүүргийн Жишиг эмнэлэгт өгөх зохион байгуулалт хийж байна. Ингэснээр бидний хэлж заншсан Яармагийн 300 орт буюу ЭНЭҮТ-ийн ачаалал буурах юм.
Сүхбаатар дүүргийн нэгдсэн эмнэлэгт 170 хүүхэд эмчлүүлж байна. Хүүхдийн 120 орон дээрээ нэмээд дотор мэдрэлийн тасаг болон эмч нарын өрөөгөө суллаж, 70 ор нэмсэн. 190 ортойгоор томуугийн дэгдэлтийг даван туулахаар ажиллаж байна.
Үүнээс гадна хүний нөөц, амьсгалын аппарат, хүчилтөрөгч өтгөрүүлэгч, тарианы шахуурга, хүүхдийн даралтны аппарат, халуун хөшиг зэрэг шаардлагатай тоног төхөөрөмжүүдийг эмнэлгүүдрүү өгөх ажлыг эхнээс шийдвэрлээд явж байна” хэмээн мэдээлжээ.
Эмнэлгийн байгууллагууд бүх арга хэмжээг яаралтай авч хэрэгжүүлж байгаа ч өвчлөл буурахгүй байна. Оны өмнө томуугийн дэгдэлт нэмэгддэг тул маскаа зүүх, дархлаагаа дэмжих, олон нийтийн ажилд ханиадны шинж тэмдэгтэй бол оролцохгүй байхыг зөвлөж байна.
Сэтгэгдэл (0)
Сэтгэгдэл бичигдээгүй байна