Эрүүл мэндийн яам БНСУ-ын нэр хүнд бүхий дөрвөн компанитай Эрүүл мэндийн даатгалын сангаас хөнгөлөлт олгож буй 18 нэр төрлийн эмийг худалдан авахаар үнийн хэлцэл хийгээд байна. Энэ долоо хоногт тэдгээр компаниудын нэг болох БНСУ-ын “DONGKOO BIO & PHARM” эмийн үйлдвэртэй ЭМЯ болон ЭЭХХЗГ хамтын ажиллагааны гэрээ байгуулжээ.
Эрүүл мэндийн сайд Т.Мөнхсайхан энэ үеэр Монгол улсын Засгийн газар чанартай эмийг хямд үнээр авах бодлогыг эрчимтэй хэрэгжүүлж байгааг онцлоод ДЭМБ-аас хүлээн зөвшөөрөгдсөн, эмийн хатуу зохицуулалттай улс орнуудаас хямд үнээр чанартай эм авах зорилго тавьж ажилласан. Өнөөдөр энэ ажлын маань эхлэл тавигдаж байна. Олон улсын туршлагаас харахад энэ төрлийн эмийн хэлцлүүдийн үнэ жилээс жилд буурч, төрөл нь нэмэгддэг. Манай улс ч энэ жишгийг дагаж, улсын хэмжээнд чанартай эмийг хямд үнээр ямар нэгэн тасалдалгүйгээр хангах ажлыг хийх болно гэсэн байна.
Худалдан авалтын хэлцлийн анхны гэрээг хийсэн БНСУ-ын “Dongkoo Bio & Pharm” үйлдвэрийнхэн манай улсад чихрийн шижин, артерийн даралт ихдэлт, цус шингэлэх, мөөгөнцрийн эсрэг зэрэг 5 нэр төрлийн эмийг экспортлох бөгөөд ижил найрлагатай эмийн гаалийн үнээс дунджаар 50 хувь хямд үнээр зах зээлд нийлүүлж, ЭМД-ын сангаас үнийн хөнгөлөлттэйгөөр иргэдэд олгох юм. Ингэснээр Монгол Улсын иргэд хямд үнэтэй, чанартай эмээр хангагдах тогтолцооны эхлэл тавигдаж байна.
Энэ удаагийн БНСУ-ын “Dongkoo Bio & Pharm” үйлдвэрээс нийлүүлэх эмийн тээвэр ложистикийг Азифарм ХХК хариуцаж байгаа аж.
.
Сэтгэгдэл (0)
Сэтгэгдэл бичигдээгүй байна