ЭМИЙГ ЖОРГҮЙГЭЭР, ДУР МЭДЭН АВЧ УУСНААС АМЬ НАСАА АЛДСАН ТОХИОЛДОЛ ЦӨӨНГҮЙ БАЙНА

Эрүүл мэндийн сайд Т.Мөнхсайхан өчигдөр /2024.11.12/ Засгийн газрын "Иргэд, олон нийттэй харилцах 11-11" төвд ажиллаж, иргэдтэй биечлэн уулзаж, санал хүсэлтийг нь шийдвэрлэлээ. Мөн 11-11 утсаар  эмнэлгийн тусламж, үйлчилгээтэй холбоотой асуудлаар хандсан иргэдтэй  Эрүүл мэндийн яамны болон төрөлжсөн мэргэшлийн эмнэлгийн удирдлагууд шууд холбогдон асуудлыг нь шийдвэрлэх арга хэмжээг авчээ.

Иргэдээс гаргаж байгаа гомдлын дийлэнх хувийг эзэлж эмийг жороор түгээхтэй холбоотой асуудлаар эзэлж байна. Энэ талаар Т.Мөнхсайхан "Монгол Улс 2021 оноос эхлээд  хөнгөлөлтттэй эмийн жорыг цахим хэлбэрээр бичиж, эмийн сан иргэнд олгодог тогтолцоог нэвтрүүлж, ашиглаж хэвшсэн байсан бөгөөд энгийн эмийг худалдан авахад цахим систем ашиглагддаггүй байсан. Учир нь Монгол Улсад бүртгэлтэй 2500 эмийн сангаас 1100 орчим эмийн сан нь цахим жорын программ хангамжгүй байсантай холбоотой.

Манай улсад эмчийн хяналтад хэрэглэх эмийг жоргүйгээр, дур мэдэн эм авч ууснаас үүдэн амь насаа алдсан тохиолдлууд цөөнгүй байна. Иймд зайлшгүй эмчийн хяналтын дор жортой олгохоор үйлдвэрлэгчээс тавигдсан шаардлагыг биелүүлдэг тогтолцоонд шилжих шаардлага байгааг үндэслэн эмийн жорын программ хангамжийг өргөтгөснөөр эмч нар ямар ч төрлийн эмийг цахимаар бичих боломжийг бүрдүүллээ. Ямар эмийг, ямар тунгаар, хэдий хугацаанд уух ёстой гэдгийг эмч тухайн иргэнийг үзэж байж шийддэг төдийгүй иргэн болон эмчийн хариуцлага хоёр талдаа яригддаг асуудал. Энэ асуудлын талаар ард иргэд, эмнэлгийн мэргэжилтнүүд нэгдсэн ойлголтод хүрч, хэрэгжилтийг хангаснаар Монгол улсын эмийн чанар аюулгүй байдал, зохистой хэрэглээ, нөөцийн мэдээлэл ил тод болно" гэж онцолсон юм. Хэрэв төр, хувийн хэвшлийн аль ч байгууллагын эмч цахим эмийн жор бичихгүй байх болон эмийн сантай холбоотой асуудлаар 119 дугаарт хандаж, шийдвэрлүүлэх боломжтой болсныг мөн тодотгов. 

Эрүүл мэндийн сайд Т.Мөнхсайхан цаашид эрүүл мэндийн тусламж үйлчилгээний талаарх гомдлуудыг цаг алдалгүй шийдвэрлэх зорилгоор Засгийн Газрын “Иргэд, олон нийттэй харилцах 11-11 төв”-д сар бүр ажиллаж, санал хүсэлтийг хүлээн авч, иргэдтэй уулзаж байхаар болжээ. 

Засгийн Газрын “Иргэд, олон нийттэй харилцах 11-11 төв”-д өнгөрсөн аравдугаар сард эрүүл мэндийн салбартай холбоотой нийт 463 өргөдөл, гомдол, санал хүсэлт ирсний 52.4 хувь нь эмнэлгийн тусламж үйлчилгээ, 37.5 хувь нь эмийн жортой холбоотой санал, гомдол эзэлсэн байна.