​ТӨРСНӨӨС ӨӨРЦГҮЙ СЭТГЭЛТ БАГШ МИНЬ

Бурханы шашны томоохон төлөөлөл, Монгол Улсын Соёлын Гавъяат Зүтгэлтэн, Бурханч лам Г.Пүрэвбат багш маань жанч халсан тухай мэдээг гэнэт л сонссон. Юутай харуусалтай, юутай гашуудалтай.

Төрснөөс өөрцгүй сэтгэлт багш минь эгэлгүй аугаа, энгийн сайхан, бодь сэтгэлт, гэгээрлийн хутгийг олсон сайхан хүмүүн байлаа. Хүн бүхэнтэй багш нь гэж хээгүй сайхнаар харьцана. “Өнөөдөр” сонинд ажиллаж байхдаа ярилцлага авах завшаан тохиож тэр цагаас хойш багшийнхаа авшгийг мөн ч их хүртсэн дээ.

Солонгост ирэхэд нь ойр тойрныхноо дагуулаад их л олуулаа очиход минь олон улсын өндөр зэрэглэлийн зочид буудалд тухалсан багш маань хээгүй сайхнаар маш хүндэтгэлтэй хүлээж аваад, дор бүр нь адис хүртээж билээ. Тэгэхэд “Богдсын ном цагаан лянхуа” номоо хэвлүүлэх ажлаар ирсэн байсан юм.

Эхнэр Ким эгч бас дэндүү сайхан энгийн зантай. Монгол хоолыг тэр дундаа цуйванг маш амттай хийж сурсан байсан. Солонгост ирэх тэр үед нь бага охин нь зургаан настай байсан санагдаж байна. Ким эгч, багш хоёртой Сөүл хотын төв дэлгүүрүүдээр хамт явах болов. Тэгэхэд багш маань “Багш нь ямар нарийн ширийн юм мэдэх биш. Ким эгчид нь дэм болоод явж байя” гэж хэлээд нуруугаа үүрэн, дагаж явахдаа Ким эгчийг нэг хувцас сонгоод саналыг нь асуухаар “Өөрөө мэд ээ ханиа. Боломжийн л юм байна” гэж хариулна. Тэгээд эмэгтэй хүүхдийн зуны сандаал харуулаад, бага охиндоо таарах болов уу гэж асуухад нь багш хуруугаараа төөлж үзээд размерийг нь сонгож билээ.

Солонгосоос ирээд, Аглагийн хийд гэж их сайхан хийд байгуулсан тухайг нь сонсоод, бас л найз нөхөд, хамаатан саднаа дагуулаад яваад очсон. Хүний оюун санаа гэдэг хэмжээлшгүй аугаа, зорилгодоо хүрэх юм бол гайхамшгийг бодитойгоор бий болгож чаддагийг багшийнхаа санаачлан бүтээн байгуулсан Аглагийн хийдээс харж, бахдан биширсэн. Нэг хүн энэ насандаа хийж барамгүй ихийг бүтээсэн дээ багш маань.

Сэтгэлийн зул бичих болоход олон зүйлийг бичмээр байвч яг цагаа тулахаар тулгамдаад орж ирдэггүй юм байна. Хийж бүтээх ид насандаа та минь тэнгэрийн орноо зорилоо. Жинхэнэ бурханы оронд бурхан бүтээх их үйлсээ үргэлжлүүлэхээр явсан юм байлгүй дээ. Сайхан Монгол орондоо эргэж заавал төрөөрэй.

                                                                                              Баасанцэрэнгийн Туул