ХҮСЭЛ МӨРӨӨДЛӨӨ БҮҮ ОРХИОРОЙ

Цаг хугацаа урсаад л... Завгүй амьдралын хэмнэлд автан хойш тавиад байсан  мөрөөдлүүдээ та нэг л өдөр биелүүлэх боломжгүй ч болж мэднэ.

Өнөөдрийн аж амьдрал,  хэрэгцээгээ хангах, зээлээ төлөх, гэр бүлээ авч явахын төлөө хичээсээр бидний он жилүүд урссаар байдаг. Маргааш л хийнэ дээ гэх ч эрч хүч, бусад зүйл алдагдсан байх нь олон.  

Хүн зөндөө л зүйл мөрөөднө шүү дээ. Бүгдэд нь хүрэх нь хэд бол гэх ч хүсэл мөрөөдлөө хаялгүй, хааяа ч болов өөрийн дотоод сэтгэлээ чагнаж байгаарай.

Тэнд нэг жаахан хүү, эсвэл охин хүсэл, мөрөөдлөө санагалзан суугаа ч юм билүү. Өдөр тутмын амьдралдаа дарагдан, давчуу цаг хугацаанд баригдсаар өнгөрөөхөд амьдрал дэндүү уйтгартай мэт.

Бусдын нүдэнд амжилттай л яваа нэгэн бүсгүйтэй ярилцахад өөрийнхөө жинхэнэ хүслээс зөндөө төөрсөн талаар ярьсан юм.

Ажлаа урагшлуулж, карьер хийж, мэргэжлээ дээшлүүлж, магадгүй олон хүн “атаархахаар”  яваа ч түүнд нэг л зүйл дутуу санагдаад байж. Эцэст нь тэр өөрийн карьераа бүрэн эргүүлж, дотоод хүсэл мөрөөдөл рүүгээ аажуухан дөхөж байгаа гэсэн. Олон жил амжилттай явсан ажлаа шууд солиход хэцүү учир ягуухнаар өөрчилж байгаа гэсэн юм. Тийм ч учраас хүүхдүүдийг багаасаа өөрийгөө таньж, мэргэжлээ зөв сонгоосой, цаг хугацаа битгий алдаасай гэж хүсдэг гэсэн.   

Дэлхийн хамгийн баян хүн гэгддэг Билл Гейтс ч хүн болгонд бусдаас арай илүү нэг чадвар байдаг, түүнээ эрт олж мэдээд улам сайжруулаад, түүгээрээ амьдарвал аз жаргалтай, амжилттай ч байх болно гэж зөвлөсөн байдаг.

Танд өөрийн доторх хүнтэйгээ ярилцах зав байдаг уу. Эсвэл завгүй амьдралын хэмнэлээр нэг ажлаас нөгөө рүү адган гүйж явна уу.

Хүний амьдрал цаг хугацаатай. Эргээд харахад явсан зам чинь, хийсэн ажил тань танд аз жаргал бэлэглэдэг тэр зүйл байвал сайхан.

Хүсэл мөрөөдөлдөө цаг гаргаж, түүнээ биелүүлэхийн төлөө алхаарай. Тэнд л та жинхэнэ аз жаргалыг мэдрэх болно.