Монгол Улсын Их Хурал 1996 онд жил бүрийн 9 дүгээр сарын 10-ны өдрийг улс төрийн хилс хэрэгт хэлмэгдэгсдийн дурсгалыг хүндэтгэх өдөр болгон орон даяар хүндэтгэн өнгөрүүлж байхаар шийдвэрлэснээс хойш өдгөө 29 дэх жилдээ хэлмэгдэгсдийн дурсгалыг хүндэтгэн өнгөрүүлж байна.
Улс төрийн хэрэгт хэлмэгдэж шийтгэгдсэн иргэдээс өнөөдрийн байдлаар нийт 31,635 иргэнийг цагаатгажээ.
Цагаатгалын хууль батлагдсан 1998 оноос хойших хугацаанд 500,0 мянга болон 1 сая төгрөгийн нөхөх олговрын хүрээнд 16 тэрбум 608 сая төгрөгийн нөхөх олговрыг 18,379 иргэнд, ххэлмэгдүүлэлтийн хор уршгийг өөрийн биеэр мэдэрч, бие махбод, сэтгэл санааны хохиролд хамгийн ихээр өртсөн хэлмэгдэгч, түүний эхнэр /нөхөр/, төрсөн болон үрчилж авсан хүүхдэд 40 болон 80 сая төгрөгийн нөхөх олговор олгох ажлын хүрээнд 100 тэрбум 600 сая төгрөгийн нөхөх олговрыг 1863 иргэнд тус тус олгосон бөгөөд нийт 20,242 иргэнд 117 тэрбум 208 сая төгрөгийн нөхөх олговрыг олгоод байна.
Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуульд өөрчлөлт оруулах тухай хууль УИХ-ын чуулганаар батлагдаж цагаатгуулах тухай өргөдөл, гомдлыг хүлээн авах хугацаагүй болж, байнга нээлттэй хүлээн авахаар болсон. Хуульд ийнхүү өөрчлөлт орсноор хэлмэгдүүлэлтийн улмаас нийгэмд учирсан хор хохирол, үүсэж бий болсон шалтгаан нөхцөлийг тодорхойлох, хэлмэгдэгчдийг цагаатгах, нэр төрийг сэргээх, дурсгалыг мөнхжүүлэхэд бодитой хувь нэмэр оруулах юм.
Сэтгэгдэл (0)
Сэтгэгдэл бичигдээгүй байна