Францын Страссбургийн Их Сургуулийн Эмнэлгийн зүрхний зөвлөх мэс засалч, профессор Филлип Биллау тэргүүтэй хүүхдийн зүрхний мэс заслын багийн 5 хүний баг монгол эмч нарын хамт Улсын Гуравдугаар Төв эмнэлэг дээр энэ сарын 25-31-ний өдрүүдэд мэс заслын тусламж үйлчилгээг үзүүлж байна.
Люксембургийн Их Гүнт улсын Засгийн газрын буцалтгүй тусламжаар хэрэгжиж байгаа төслийн хүрээнд уригдан ирсэн тус баг бүрэлдэхүүн 8 дугаар сарын 25-ны өдөр мэс засал эмчилгээний заалт гаргах шаардлагатай зүрхний хүнд хавсарсан эмгэгтэй 4 хүн, бага насны 20 хүүхдэд хамтарсан үзлэг, зөвлөгөөн хийжээ.
Зочин багийн хамтран ажиллах хугацаанд монгол мэргэжилтнүүд хараахан бие даан хийх боломжгүй хүнд хэлбэрийн хөх гажгууд болох баруун талын бөглөрөлтөт гажгууд, зүрхний төрөлхийн зүүн талын бөглөрөлтөт гажиг, уушгины венийн бүтэн буруу оролт болон Шоннын гажиг зэрэг нийт 9 тохиолдолд мэс засал эмчилгээ хийхээр төлөвлөөд ажиллаж байна.
Сэтгэгдэл (0)
Сэтгэгдэл бичигдээгүй байна