СУРАГЧДЫН ҮДИЙН ХООЛОНД ШИМ ТЭЖЭЭЛИЙН ТЭНЦВЭРТЭЙ ЦЭС АШИГЛАНА

Япон улсын Жайка олон улсын байгууллагын “Монгол улсын ерөнхий боловсролын сургуулийн үдийн хоол үйлдвэрлэлийг дэмжих” төслийн хүрээнд боловсруулсан “Шим тэжээлийн тэнцвэртэй цэс” номын нээлт, сургалтын арга хэмжээг өчигдөр /2024.08.20/ зохион байгуулжээ.

Боловсролын яам, Япон Улсын олон улсын  хамтын ажиллагааны байгууллага /ЖАЙКА/-аас хамтран ерөнхий боловсролын сургуулийн хоол үйлдвэрлэлийг дэмжих төсөл 2021 оноос эхлэн хэрэгжүүлсэн. Төслийн хүрээнд Өвөрхангай, Дундговь аймаг болон нийслэлийн сургуулиудаас сонгон хүүхдийн эрүүл мэндийн шим тэжээлийн байдалд судалгаа хийн, гарсан үр дүнд үндэслэн шаардлагатай эрдэс, амин дэмээр баялаг цэсийг боловсруулан гаргажээ.

Боловсролын яам, ЭМЯ, ХХААХҮЯ, НЗДТГ, НБГ, ШУТИС, Өвөрхангай, Дундговь аймгийн БГ, ХХААГ, ЭМГ болон төсөл хэрэгжиж буй сургуулиудын төлөөлөл танхимаар оролцсон бол бусад аймгийн боловсролын газар, ерөнхий боловсролын сургуулийн захирал, хоол зүйч, тогооч зэрэг 510 төлөөлөл цахимаар оролцсон арга хэмжээний хүрээнд дараах чиглэлээр мэдээлэл хүргэсэн байна.

• Сургуулийн хоол үйлдвэрлэлд тэнцвэртэй хоолны цэс ашиглах арга зүй,
• Цэсийн номыг ашиглан хоол, шим тэжээлийн боловсрол олгох аргачлал,
• Аймагт нэгдсэн хоолны цэс хэрэгжүүлэх арга хэмжээ,
• Загвар сургуулиудад хийгдэж буй мониторингийн үр дүн,
• Үйл ажиллагааг сайжруулах арга зам.

Тус арга хэмжээний үеэр төсөл хэрэгжиж буй ерөнхий боловсролын сургуулиудад Жайка олон улсын байгууллагаас хоол шим тэжээлийн боловсрол олгох сургалтын материал гардуулан өгчээ..

Энэхүү “Шим тэжээлийн тэнцвэртэй цэс” номд шим тэжээлийн агууламжийг өнгөний системээр илэрхийлсэн 99 нэр төрлийн сургуулийн хоолыг багтаан, энгийн аргаар  сонгон хэрэглэх хувилбарыг оруулж иржээ. Ингэхдээ бодит судалгаа болон жишиг төслийн үр дүнд суурилан боловсруулснаас гадна цэвэр жин, шим тэжээл болон үнийн тооцооллыг номд тусгасан байна.

Цаашид улс орон даяар хүүхдийн хоолны шим тэжээлийн тэнцвэрт өнгөний системийг хэрэгжүүлж, цэцэрлэг, сургуулийн хоол үйлдвэрлэлд оролцогч талууд, хүүхэд, эцэг эх, асран хамгаалагчдад хоол хүнсний шим тэжээлийн талаарх мэдлэгийг олгох аж.

Сургууль, цэцэрлэгийн хүүхдийн хоолны шим тэжээлийн өнгөний систем:

• Шар: Нүүрс усны эх үүсвэр
• Улаан: Уургийн эх үүсвэр
• Ногоон: Амин дэм, эрдэс бодисын эх үүсвэр
• Цэнхэр: Кальци, уургийн эх үүсвэрийг тус тус тэмдэглэжээ.