2021 оны зун Криштиано Роналдо Италийн “Ювентус”-аас явахаар шийдмэгцээ, шинэ клубын эрэлд гарсан. Түүнийг Английн “Манчестер Сити” авахаар тохиролцоонд хүрч, бүр ирчихлээ гэж “Сити”-гийн зарим фанат баярлан постолж, “Улаан чөтгөрүүд”-ийн фанатуудын хор шарыг малтсан билээ.
Гэвч эцсийн эцэст Роналдо шуугиант хөршид бус харин “Манчестер Юнайтед”-д эргэн очсон. Тухайн үеийн талаар португал довтлогч эргэн дурсчээ.
“Үнэндээ тэгэхэд “Манчестер Сити”-д оччих тун дөхсөн шүү. Ёстой сүүлчийн ганц алхам л үлдсэн байлаа. Пеп Гвардиола намайг авахын тулд чадах бүхнээ хийснээ хэлж байлаа.
Гэвч та нар мэднэ дээ, миний түүх “Манчестер Юнайтед”-тай салшгүй холбоотой. Миний зүрх сэтгэл үүрд тэндээс уяатай. Гэвч миний байх үеийнхээс их өөрчлөгдсөн байлаа.
Тухайн яриа хэлэлцээрт Сэр Алекс Фергюсон оролцсон юм. Гол яриа тэр л болсон. Түүнтэй уулзсаны дараагаар миний зүрх сэтгэл огт эргэлзэлгүйгээр маш чанга ойлгомжтойгоор “Юнайтед” руу оч гэж дотроос хэлж байлаа. Энэ бол зөв мөн сайн бодсон шийдэл байсан. Тиймээс “Сити”-д оччих дөхсөн ч гэлээ очоогүйдээ харамсдаггүй” хэмээн Роналдо өгүүлсэн байна.
Р.ГЭГЭЭ
Сэтгэгдэл (0)
Сэтгэгдэл бичигдээгүй байна