Английн Премьер лигийн 2024/25 оны улирал эхэллээ. “Арсенал” талбайдаа “Вулвэрхэмптон”-ыг 2:0-ээр хожсоноор гурван оноотойгоор лигийн тэргүүн хэсэгт бичигдэж байна.
Өнгөрсөн улиралд сүүлчийн тойрог хүртэл аваргын төлөө өрсөлдөөд аман хүзүүдсэн “Арсенал”-ынхан энэ удаад алдсанаа нөхөх тухай яриа гарлаа. Микел Артета хэвлэлийн бага хурал дээр сэтгүүлчдийн асуултад хариулахдаа багийнх нь залуус аварга болох зорилго тавьсныг дуулгажээ.
“Клубын бүх тоглогчид цугласан том хуралдаан бид хийсэн. Тэр хурал дээр хөлбөмбөгчид маань надад “Аварга болъё” гэж хэлсэн. Энэ бол манай залуусын улирлын зорилго. Бид жижиг биш том зорилго тавих болно.
Өмнөх улиралд аваргын төлөө өрсөлдсөндөө сэтгэл ханахгүй. Бид илүү том амжилтад хүрэхийг хүсч байна. Хэрхэн тоглох, яаж өөрсдийгөө хөгжүүлж сайжрахыг ч мэдэж байгаа. Манай багт асар их нөөц бололцоо бий. Түүнийгээ л ашиглаж ёстой юм” хэмээн Артета өгүүлжээ.
“Вулвэрхэмптон”-ыг хожиход Букайо Сака өөрийн нэрийн хуудас шахуу болсон цохилтоороо гоол оруулсан. Түүнийг баруун жигүүрт бөмбөг аваад төв рүү дараад цохидгийг бүгд мэдсээр байж боломжийг нь яагаад олгоод байдгийг Артета тайлбарлажээ.
“Их сайн хөлбөмбөгчид сайн хийдэг зүйлээ хэзээ ч хийж чаддаг юм. Жишээ нь, Мессиг хаашаа гүйх, хаашаа цохихыг бүгд мэддэг. Тэгсэн хэрнээ хамгаалж, хааж чаддаггүй. Үүнтэй адил юм. Зогсоож чадахгүй л байхгүй юу. Энэ нь тухайн хөлбөмбөгчийн ур чадварыг л харуулж байгаа юм” хэмээн Артета хэлсэн байна.
Сэтгэгдэл (0)
Сэтгэгдэл бичигдээгүй байна