Цагтаа “Алтан бөмбөг” гардаж явсан англи довтлогч Майкл Оуэний шинэ улирлын таамаглал хэдэн хоногийн өмнөөс олны анхаарлыг татаж, зарим нь түүнийг хэт ихийг мэдэх гэж хичээжээ хэмээн инээлдэн шоолсон бол зарим нь байж болох зүйл гэж дэмжиж буй юм байна.
Оуэний таамаглалын хамгийн гол дуулиан дагуулсан зүйл нь “Манчестер Сити”-г 2024/25 оны улиралд Премьер лигт дөрөвдүгээр байр эзлүүлсэн нь юм. Харин аваргын цомыг “Арсенал”-д өгч, өөрийн унаган клуб “Ливерпүүл”-ийгээ аман хүзүүнд оруулжээ.
“Би таамаглал бүрдээ лигийн эхний дөрвөн байрт “Арсенал”, “Манчестер Сити”-г нэрлэсээр ирсэн. Харин энэ удаад үүн дээр “Ливерпүүл” эхний дөрөвт байна гэж нэмж оруулъя. Хэдийгээр Арне Слот шинэ ажилдаа дасаж, гаршихаас их зүйл шалтгаалах ч гэлээ “Ливерпүүл”-д итгэж байна.
Мөн “Ньюкасл”, “Астон Вилла”-гийн бүрэлдэхүүн их хүчтэй, бат бөх санагдлаа. Тиймээс цаашид улам сайжрах болов уу. Харин энэ багууд яаж жагсах вэ гэвэл “Манчестер Сити” аварга болохгүй бол хурдаа жаахан сааж, хойш сууж мэднэ.
Хэрвээ үнэхээр “Манчестер Сити” эхний 10 тоглолтод аваргын өрсөлдөөнд байж чадахгүй юм бол өөр зорилго өмнөө тавьж мэднэ. Тиймээс би тэднийг энэ улирлын гол гэнэтийн бэлгийг барина гэж таамаглалаа.
Ингээд эхний дөрвийг жагсаавал, “Арсенал” түрүүлнэ. Харин “Ливерпүүл”-ийг хоёрт орууллаа. “Астон Вилла” гуравт, “Манчестер Сити” дөрөвт” хэмээн Оуэн өгүүлжээ.
Та бүхэн ч гэсэн өөрийнхөөрөө “Оуэндэж” болно шүү дээ.
Сэтгэгдэл (0)
Сэтгэгдэл бичигдээгүй байна